Էկոնոմիկայի նախարար Արծվիկ Մինասյանը կառավարության այսօրվա նիստից հետո լրագրողների հետ զրույցում անդրադառնալով հարցին՝ ՌԴ նախագահ Վլադիմիր Պուտինի այն հայտարարության վերաբերյալ հարցին, որ Հայաստանը ԵՏՄ կազմում տնտեսական օգուտներ ու ՀՆԱ-ի 10 տոկոսանոց աճ է ունեցել, շրջանցեց ՀՆԱ-ի 10 տոկոսանոց աճի մասին Պուտինի խոսքը, և ասաց, որ արտահանման ոլորտում աննախադեպ ցուցանիշներ են արձանագրվել:
Ըստ նախարարի՝ Հայաստանի անկախության պատմության ընթացքում այս տարվա առաջին կիսամյակում պատմականորեն ամենաբարձր արտահանման ցուցանիշն ունենք՝ Հայաստանից դեպի ՌԴ արտահանման առումով՝ 168 մլն դոլար:
«Այսպիսի ցուցանիշ, զուտ ֆիզիկական ցուցանիշ, պատմականորեն մենք չենք ունեցել վերջին 10 տարիների կտրվածքով: Ամենամեծը եղել է 143 մլն դոլար, եթե չեմ սխալվում, 2013 թվականին: Հիմա փաստորեն մենք այս տարվա առաջին կիսամյակում այդ ցուցանիշից շուրջ 25 մլն դոլարով ավելի արտահանման ծավալներ ենք ունեցել: Սա լավատեսություն ներշնչում է, որովհետև եթե ԵՏՄ անդամակցության առաջին ժամանակահատվածում անորոշությունը շատ էր, ապա հիմա աստիճանաբար հաղթահարվում է»,- նշեց Արծվիկ Մինասյանը և հավելեց, որ ակնկալում են, որ առաջիկայում բարձրանալու են արտահանման աճի տեմպերը դեպի ԵՏՄ տարածք: «Մենք դեռ բազաթիվ հնարավորություններ ունենք այստեղ, որ պետք է կիրառենք՝ չմոռանալով ԵՏՄ-ից դուրս երրորդ երկրների հետ մեր հարաբերությունները, հատկապես ԱՄՆ-ի»,- ասաց նախարարը:
Մանրամասները՝ տեսանյութում: