«ԼՂՀ-ի ներկայացրած սահմանադրական հայեցակարգը նման է ամերիկյան մոդելին՝ ժողովրդավարություն, որը հիմնված է նախագահի ինստիտուտի վրա: Ղարաբաղի ընտրության խնդիրն է, իրենք են որոշել սահմանադրական այդ հայեցակարգը»,- այս մասին այսօր կառավարությունում լրագրողների հետ զրույցում ասաց ՀՀ փոխարտգործնախարար Շավարշ Քոչարյանը:
Շավարշ Քոչարյանը համաձայն չէ այն ձևակերպման հետ, որ Լեռնային Ղարաբաղի Հանրապետությունն ընտրել է «սուպերնախագահական» համակարգը. «Շատ անգամ, երբ ասում են նախագահական մոդել, պատկերացնում են Ադրբեջանի տիպի պետության: Դա այդպես չէ, որովհետև այն մոդելը, որ ընտրում է Ղարաբաղը, ավելի շատ նման է ամերիկյան մոդելին, այսինքն՝ ժողովրդավարություն, որը հիմնված է նախագահի ինստիտուտի վրա: Իմ կարծիքով՝ այստեղ դերակատարում է ունեցել այն, որ դեռևս ԼՂՀ հարցը վերջնական կարգավորված չէ, և արտաքին վտանգի անմիջական գիտակցումն է Ղարաբաղում բերել այդպիսի որոշման»:
Դիտարկմանը, թե Հայաստանի սահմաններն էլ վտանգի տակ են, բայց Հայաստանն ընտրել է խորհրդարանական համակարգը, Շավարշ Քոչարյանն ասաց, որ պետք է հաշվի առնել մի քանի հանգամանք. «Նախ՝ երկրի մեծությունը, պոտենցիալը: ԼՂՀ-ում տարբեր հանգամանքներից ելնելով՝ ընտրել են այդ մոդելը: Պետք է ունենալ ազդեցիկ խորհրդարան. իրենց խորհրդարանում 33 պատգամավոր է: Բազմաթիվ հարցեր կան: Այստեղ կան մասնագիտական հանգամանքներ, որովհետև Հայաստանի ներքին պոտենցիալը, նույնիսկ մարդկանց թվաքանակը, մասնագետներն այլ են, Ղարաբաղինն այլ է, դրա համար ԼՂՀ-ում նախագահական մոդելն ընտրելիս հաշվի են առնվել բազմաթիվ գործոններ»:
Շավարշ Քոչարյանն անդրադառնալով հարցին, թե ինչ փուլում է գտնվում ԼՂՀ խնդրի կարգավորումը, ասաց, որ նախ և առաջ պետք է կատարվեն Վիեննայի և Սանկտ Պետերբուրգի պայմանավորվածությունները. «Եթե դրանք իրականացվեին, ապա բոլորս կտեսնեինք, իսկ առանց դրանց իրականացման ի՞նչ առաջընթացի մասին կարելի է խոսել: Իսկ վտանգները միշտ եղել են, կան, և միշտ պետք է պատրաստ լինենք ամեն ինչի»:
Մանրամասները՝ տեսանյութում: