Ոստիկանի նկատմամբ բռնություն գործադրելու մեջ մեղադրվող` «Հիմնադիր խորհրդարանի» անդամ Գևորգ Սաֆարյանի գործով դատական նիստը Կենտրոն և Նորք Մարաշ համայնքների ընդհանուր իրավասության դատարանում կրկին հետաձգվեց:
Պաշտպան Տիգրան Հայրապետյանը լրագրողների հետ զրույցում հայտնեց, որ նիստը կրկին հետաձգվեց մեկ ամսով, քանի որ Գևորգ Սաֆարյանին դատարան չէին բերել:
«Առաջին անգամ, երբ հուլիսի 18-ին դատական նիստը նշանակվեց, ասացին, որ դատավորը չի պահանջել Սաֆարյանի ներկայությունը: Հաջորդ նիստը, որը հուլիսի 25-ին տեղի ունեցավ, ասացին, որ նպատակահարմար չեն գտնում Սաֆարյանի ներկայությունը դատարանում: Քրեակատարողականից էլ հայտնեցին, որ Գևորգին դատարան չեն տեղափոխում՝ ելնելով անվտանգության նկատառումներից: Երևի վախեցել են, որ համախոհները կօգտվեն իրավիճակից և հանրահավաք կկազմակերպեն», – ասաց Տիգրան Հայրապետյանը:
Դատարանի այս քայլը փաստաբանը որակեց միտումնավոր՝ ընդգծելով, որ անօրինական կերպով է կալանավորված, կան մի շարք տեսանկարահանված փաստեր, որոնք թույլ են տալիս չեղարկել Սաֆարյանի նկատմամբ որպես խափանման միջոց կիրառված կալանքը:
Հիշեցնենք՝ Գևորգ Սաֆարյանին մեղադրանք է առաջադրվել Քրեական օրենսգրքի 316-րդ հոդվածի 1-ին մասով:
Մանրամասները՝ տեսանյութում: