Առցանց հարթակները, ինչպիսիք են Facebook-ը, Twitter-ն ու YouTube-ը, ոչ բավարար ջանքեր են գործադրում համացանցում ծայրահեղականության քարոզչության դեմ պայքարի համար։ Այս մասին ասվում է բրիտանական խորհրդարանի Համայնքների պալատի՝ ներքին հարցերով կոմիտեի հայտարարության մեջ, որը տարածվել է համացանցով արմատականացման երևույթի հետազոտման արդյունքներով։ Այս մասին փոխանցւոմ է BBC-ն։
«Չնայած այն բանին, որ Twitter-ը 2015-ի կեսերից 2016-ի փետրվարն ընկած ժամանակահատվածում արգելափակել է 125 հազար օգտահաշիվ, իսկ Google-ը 2014 թվակաին հեռացրել է 14 մլն տեսանյութ, իրականում դա միայն մեկ կաթիլ է ծովում։ Նրանք պետք է հասկանան, որ հարյուր միլիոնների հասնող շահույթի և միլիարդավոր հաճախորդների հետ պետք է լինի նաև պատասխանատվության զգացում այն ազդեցության համար, որն ունենում է իրենց կայքերում տեղադրած ծայրահեղական կոնտենտը»,- ասվում է խորհրդարանականների հայտարարության մեջ։
Կոմիտեի ղեկավար, լեյբորիստ Քիթ Վազը հայտարարել է, որ համացանցը կենսական աղբյուր է ԴԱԻՇ-ի և այլ ահաբեկչական խմբերի համար։
Հետաքննությունն անցկացվել է 12 ամիս։ Կոմիտեի անդամները հանդիպել են Եվրոպոլի ներկայացուցիչների հետ, ուսումնասիրել ծայրահեղականների ֆորումներն ու զրուցել արմատականացված բրիտանացի մուսուլմանների հարազատների հետ։
Պատգամավորները նշում են, որ սիրիական պատերազմի սկզբից Սիրիա և Իրաք է ուղևորվել Բրիտանիայի քաղաքացիություն ունեցող մոտ 800 ապագա գրոհային։