Չեմպիոնների լիգայի խաղարկության որակավորման մրցաշարի 4-րդ փուլի առաջին խաղային օրը տեղի ունենան 5 զույգի պատասխան հանդիպում:
Ստորև ներկայացնում ենք ավարտված հանդիպումների տեսությունը՝
«Ռոմա»-«Պորտու» դիմակայությունն իտալացիների համար անսպասելի ելք ունեցավ: Այս խաղում հաղթողի կոչման ֆավորիտներն առաջին խաղակեսի մեկնարկում, արդեն 8-րդ րոպեին գնդակ բաց թողեցին: «Պորտու»-ին հաշվի մեջ առաջ մղեց Ֆելիպեն: Առաջին խաղակեսի ավարտին և երկրորդ կեսի սկզբին իտալական ակումբի ֆուտբոլիստները 2 կարմիր քարտ ստացան և իրենց շանսերը հավասարեցրեցին զրոյի: «Պորտու»-ն օգտվեց այս ամենից և ևս երկու գնդակ ուղարկեց «Ռոմա»-ի դարպասը ու երկու խաղերի արդյունքում անցավ չեմպիոնների լիգայի խաղարկության խմբային փուլ: Առաջին խաղում արձանագրվել էր 1-1 հաշիվը:
«Մոնակո»-«Վիլյառեալ» զույգում իսպանական ակումբին հաջորդ փուլ դուրս գալու համար անհրաժեշտ էր առնվազն երկու գոլ հեղինակել և գոլ բաց չթողնել լրացուցիչ ժամանակից խուսափելու համար: Ինչպես նախորդ, այնպես էլ այս խաղում «Վիլյառեալ»-ը չկատարեց իր առջև դրված առաջադրանքը և կրկին պարտություն կրեց: Այս անգամ միակ գոլը մոնեգացիներից հեղինակեց Ֆաբինյոն: Թիմերի միջև առաջին խաղն ավարտվել էր 1-2` հօգուտ «Մոնակո»-ի:
«Լեգիա»–«Դանդոլկ» զույգում ֆավորիտը լեհական ակումբն էր: Առաջին խաղում հյուրընկալվելիս «Լեգիա»-ն հաղթել էր 2-0 հաշվով և մեծ առավելություն ուներ պատասխան հանդիպումից առաջ: «Դանդոլկ»-ը հյուրընկալվելիս առաջինը հասավ հաջողության, սակայն պահել առավելությունը չկարողացավ: Լեհական ակումբը հավասարեցրեց խաղի հաշիվը և հանդիպումն ավարտեց իր համար ցանկալի արդյունքով:
«Վիկտորիա Պլզեն»-«Լուդոգորեց» խաղում պատասխան մրցավեճից առաջ առավելությունը «Լուդոգորեց»-ի կողմն էր: Այս խաղում չեխական ակումբը երկու անգամ առաջ անցավ հաշվի մեջ, բայց երկու անգամն էլ զիջեց առավելությունը: Հանդիպումն ավարտվեց արդյունավետ 2-2 հաշվով, որը հաջորդ փուլի ուղեգիր տվեց «Լուդոգորեց»-ին:
«Հապոել Բեր Շևա»-«Սելթիկ» զույգի առաջին խաղից հետո արձանագրվել էր 5-2 հաշիվը: Պատասխան խաղում իսրայելական ակումբը կարողացավ 2 գնդակ խփել, սակայն դա բավարար չեղավ հաջորդ փուլ դուրս գալու համար: «Սելթիկ»-ը հանդես կգա չեմպիոնների լիգայի խաղարկության խմբային փուլում: