«Վրաստանի ԱԱԾ-ն, առաջին մամուլի ասուլիսի ժամանակ անդրադառնալով գազատարի պայթյունի հեղինակներին, նշեց, որ մի քանի ամիս հետևել է խմբին։ Երկու կարծիք կարող է լինել։ Կա՛մ խումբն է ակտիվացրել իր քայլերը, կամ էլ ԱԱԾ-ն է որոշել ընտրություններից առաջ կանխել այն։ Բայց ես չեմ կարծում, որ հատուկ նախընտրական պրոցեսներիով էր պայմանավորված սա»,- «Առաջին լրատվական»-ի հետ զրույցում անդրադառնալով գազատարի պայթեցման փորձին՝ ասաց վրացագետ Ջոնի Մելիքյանը։
Վրացագետի խոսքով՝ այս ընտրությունների ժամանակ դեռևս ֆորսմաժորային իրավիճակներ չեն եղել։ Ակտիվ աշխատում են բոլոր քաղաքական ուժերը։ Ընտրական ցուցակներն են մաս առ մաս հրապարակվում։
Ջոնի Մելիքյանի խոսքով՝ «Վրացական երազանք Ժողովրդավարական Վրաստան» կուսակցությունն է այս պահի դրությամբ հիմնական ուժը, քանի որ իրենց լիդերը Վրաստանի վարչապետն է և նախարարների մի մասը։ Կան ավելի փոքր կուսակցություններ, որոնց շանսերն այնքան էլ մեծ չեն։ «Մի քանի ոչ խորհրդարանական ընդդիմադիր ուժեր ևս կան, որոնք պայքարելու են պառլամենտի 150 տեղի համար»,- ասաց Մելիքյանը։
Մեր զրուցակցի խոսքով՝ հիմնական պայքարը մաժորիտար տարածքների համար է գնալու, քանի որ ռեսուրսներ և ուժ ունեն հիմնական կուսակցությունները։ Առաջիկա մեկ ամսվա ընթացքում ամեն ինչ պարզ կլինի։ «Ես ճիշտն ասած սպասում եմ, որ իշխող կուսակցությունը կկարողանա հաղթահարել և մեծամասնություն ունենալ պառլամենտում»,- ասաց վրացագետը։
Առավել մանրամասն՝ տեսանյութում:
