Իտալիայում մի խումբ ակտիվիստներ Պիզայի աշտարակի մոտ մզկիթի կառուցման դեմ արշավ են սկսել: Այս մասին հայտնում է ամերիկյան Religion News Service կայքը:
Նախագիծն ավելի վաղ հաստատել է տեղի քաղաքային խորհուրդը: Մզկիթի կառուցման ընդդիմադիրները հանգստյան օրերին բողոքի ակցիա են անցկացրել և ավելի քան 2 000 ստորագրություն են հավաքել: Նրանց խոսքով՝ դա բավարար է տեղի իշխանությունների որոշման վերանայման հարցով հանրաքվե անցկացնելու համար:
«Մենք պատերազմական վիճակում ենք՝ դա ձեզ դուր գալիս է թե ոչ… Մզկիթներն անհրաժեշտ է փակել, ոչ թե բացել: Դրանք վայրեր են, որտեղ ոչ թե աղոթում են, այլ ատելություն են ներարկում»,- իրավիճակը մեկնաբանել է «Առաջ Իտալիա» աջ կուսակցությունից օրենսդիրը, որը ներկա է եղել ակցիային:
Երկրի Մուսուլմանական համայնքների խորհրդի նախագահ Իզզեդին Էլզիրն ասել է. «Այդ արշավը հիմնված է քաղաքական գործիչներից եկող նախապաշարմունքներից, որոնք փորձում են ստանալ ընտրողների ձայները՝ շահագործելով վախի զգացումը Ֆրանսիայում, Բելգիայում և Գերմանիայում վերջին հարձակումներից հետո»:
Պիզայի քաղաքապետ Մարկո Ֆիլիպեսկին աջակցել է շինարարության նախագծին՝ նշելով, որ մզկիթը մասնավոր միջոցներով կկառուցվի: «20 տարի Պիզայի մուսուլմանները հավաքվում են փոքր մզկիթում քաղաքի կենտրոնում, և մինչև հիմա ոչ ոք չի բողոքել դրա դեմ»,- հայտարարել է նա:
Religion News Service-ը նշում է, որ քաղաքում 3 000 մուսուլման է ապրում: