Բրիտանական Reuters լրատվական գործակալության փոխանցմամբ՝ Իրանի նավթարդյունաբերության նախարար Նամդար Բիժան Զանգանեն հաստատել է, որ մասնակցելու է ՕՊԵԿ-ի անդամ երկրների ոչ պաշտոնական հանդիպմանը, որը անցկացվելու է սեպտեմբերի 26-28-ին՝ Ալժիրում ։
Միջազգային էներգետիկ ֆորումի ժամանակ նավթարդյունահանող երկրները բանակցելու են նավթի արդյունահանումը սառեցնելու շուրջ։ Քննարկման նախաձեռնողներն են Վենեսուելան, Էկվադորն ու Քուվեյթը։
ՕՊԵԿ-ի անդամ երկրների ու նավթարդյունահանող այլ երկրների նախորդ հանդիպումը անցկացվել է ապրիլի 17-ին՝ Քաթարում։ Դրան մասնակցել են 18 երկրներ, որոնք սակայն չեն կարողացել համաձայնության գալ, քանի որ հանդիպման շեմին հենց Իրանն է հրաժարվել մասնակցել դրան՝ դա պատճառաբանելով նրանով, որ իր դեմ միջազգային պատժամիջոցները վերացվել են միայն ոչ վաղ անցյալում և նավթի արդյունահանման մակարդակը դեռ չի հասել նախապատժամիջոցային ժամանակաշրջանի ցուցանիշին՝ օրական 4.2 միլիոն բարել։
ՕՊԵԿ-ի տվյալներով՝ 2016 թվականի հուլիսին Իրանում նավթի արդյունահանման մակարդակը կազմել է օրական 3.6 միլիոն բարել։
