«Անդրադառնալով հուլիսյան իրադարձությունների ժամանակ ոստիկանության գործողություններին՝ «Առաջին լրատվական»- ի հետ զրույցում նախկին ՄԻՊ Կարեն Անդրեասյանը նշեց, որ մի շարք դեպքերում ոստիկանությունն օրինաչափ չի գործել, դա նույնիսկ ոստիկանությունն է ընդունել՝ պաշտոնանկություններով և ծառայողական քննություններով: «Ոստիկանության խախտումներն ակնհայտ էին հատկապես հուլիսի 29-ի լույս 30-ի գիշերը: Որոշ դեպքերում ոստիկանության աշխատակիցները դրսևորել են դրական վարքագիծ»:
Անդրադառնալով ԵԱՀԿ երևանյան գրասենյակի ղեկավարի հայտարարությանն այն մասին, որ ոստիկանները գործել են օրինաչափ, Ա. Անդրեասյանը նշեց, որ այդ հայտարարությամբ երևի ոստիկանների գործունեության դրական կողմն են տեսել, քանի որ տարիներ շարունակ ֆինանսավորել են ոստիկանությանը:
Կարեն Անդրեասյանի կարծիքով՝ քաղաքական հրահանգ է եղել, և ոստիկանությունը զոհ է այդպիսի վայրագությունների:
ՏԻՄ ընտրությունները արդյո՞ք կընթանան նույն սցենարով, թե՞ նոր իրավիճակ է ստեղծվել. ի պատասխան այս հարցի՝ նախկին ՄԻՊ-ը նշեց. «Քառօրյա պատերազմից հետո Հրազդանում ընտրություններն այնպես անցկացրեցին ասես ոչինչ տեղի չէր ունեցել. այնպես որ շատ հնարավոր է այս ցավալի դեպքերից հետո լինեն Գյումրու և Վանաձորի «հրազդանյան կամ մշտական» ընտրություններ, ամեն ինչ է հնարավոր է»:
«Ինձ համար զենքի միջոցով իշխանափոխությունը անթույլատրելի երևույթ է, կա ազգային անվտանգության խնդիր, երկրի պետականության կորստի վտանգ: Ավելի վտանգավոր է, որ երբ զինված մարդիկ ապստամբում են, ստանում են այսքան մեծ հանրային աջակցություն. սա լուրջ ազդակ է ամբողջ երկրի, հատկապես իշխանություններին»,- նշեց Կարեն Անդրեասյանը:
Նրա դիտարկմամբ՝ ՏԻՄ ընտրությունները քննություն են իշխանության համար և ամբողջ ժողովրդի համար. սա իրավիճակ շտկելու փորձ է:
Անդրադառնալով դիտարկմանը, որ «Համախմբում»- ը միանշանակ չընդունվեց հասարակության կողմից, կուսակցության հիմնադրումը կապվում էր Ռ. Քոչարյանի անվան հետ՝ ՄԻՊ Կարեն Անդրեասյանն ասաց. «Առաջին օրերին իշխանական խողովակներով նետվեց այդ գաղափարևը՝ փորձ անելով վարկաբեկել կուսակցությանը՝ մեղադրելով ինչ-որ ծպտյալ հարաբերությունների մեջ , ես Ռ. Քոչարյանին չեմ տեսել կուսակցության հետ, կուսակցության հիմնադրման և գործունեության մեջ չեմ տեսել, եթե տեսնեի, չէի ամաչի և չէի թաքցնի: Դա փորձում են շահարկել, փորձ է արվում ստախոս դարձնել ընդդիմադիրներին: Իսկ իշխանությունը որ ստախոս է, մենք դա վաղուց ենք տեսել, իրենք որ պարբերաբար խաբում են, հիմա փորձում են բոլորին խաբեբա համարել: Որ վայրկյանին որ ես կասկածեմ, որ մենք խաբում ենք որևէ մեկին, ես այլևս չեմ լինի ոչ միայն մեր կուսակցությունում, այլ նաև ընդհանրապես քաղաքականության մեջ»:
Մանրամասները՝ տեսանյութում: