Սեպտեմբերի 18-ին կայանալիք ՏԻՄ ընտրություններում Մասիս քաղաքի քաղաքապետի թեկնածու Մհեր Համբարձումյանի (թույների Մհեր) որդին՝ Դավիթ Համբարձումյանը, ով նաև Վովա Գասպարյանի թիկնազորի պետ Արշակ Հակոբյանի փեսան է, նախօրեին լրատվամիջոցներից մեկին տված հարցազրույցում դեռ քարոզարշավը չմեկնարկած՝ հայտարարել էր. «Իհարկե, ընտրվելու եմ, Մասիսը ինչ խնդիր ունի, բոլոր խնդիրներով ես հենց հիմիկվանից արդեն զբաղվում եմ։ Վստահ եղեք, որ մասիսցիները գիտեն, մասիսցիները բոլորը իմ հարազատներն են, իմ սանիկներն են, մեծ մասը իմ ընկերներն են, այսինքն՝ իրենք բոլորը գիտեն՝ ես ինչեր եմ անելու, ինչ կարող եմ անել»։
«Առաջին լրատվական»-ը Դավիթ Համբարձումյանի մրցակից, ԲՀԿ-ական Կարապետ Օհանյանից հետաքրքրվեց՝ նման պայմաններում ինչպե՞ս է պատկերացնում ընտրապայքարը, երբ իր մրցակիցը քարոզարշավը չմեկնարկած՝ իրեն հաղթած թեկնածու է ներկայացնում։ «Գիտեք, դա ժողովուրդն է որոշում՝ ում է տալիս իր ձայնը։ Քավոր-սանիկով չի։ Եթե այդպես լինի, Մասիսում մի 20 ընտանիքից ավելիի էլ մենք ենք քավորություն կանգնել, մենք ենք նրանց քավորը։ Ես չեմ կարծում, որ այդ մասով նա մեզանից առավել է։ Մենք բոլորս էլ ապրում ենք նույն կյանքով ու գիտենք՝ ով ինչպես է։ Քավորությունն այնպիսի հարաբերություն է, որ ցպնելով ման չես գալիս։ Դա պետք է վաստակես, իսկ վաստակելու արդյունքում էլ կարողանաս պահել»,- ասաց ԲՀԿ-ական թեկնածուն։
Օհանյանը նկատեց, որ Դավիթ Համբարձումյանն ինքն է բարձրաձայնում իր կողմից Ընտրական օրենսգրքի խախտման մասին, երբ հայտարարում է, որ քաղաքի խնդիրներով արդեն իսկ սկսել է զբաղվել։ «Ինքն է հայտարարում դրա մասին ու նշում է, որ այդ խախտումը կատարում է ինքը, ու իր համար ընդունելի է դա։ Բայց ես տեղյակ չեմ՝ իրենք ինչ են անում»,- ասաց Օհանյանը՝ հավելելով, որ ինքը չի պատրաստվում դիմել ԿԸՀ այս խախտման առնչությամբ։
Կարապետ Օհանյանը նշեց, որ Դավիթ Համբարձումյանը Մասիսի քաղաքի բնակիչ չէ, ինչպես և գրում է մամուլը։ «Ինքը Մասիս քաղաքի բնակիչ չէ, ոչ մի օր Մասիսում չի քնել, ընդամենը ինքը ժամանակին գրանցում է ստացել՝ այս նպատակին հասնելու համար։ Բայց դա իմ գործը չի, թող իրավապահները զբաղվեն, տեսնեն՝ դա ԸՕ-ի խախտո՞ւմ է, թե՞ ոչ։ Օրենսգրքով նշված է, որ քաղաքապետ դառնալու իրավունքը տրված է միայն բնակչին։ Ես չեմ պատրաստվում դիմել ԿԸՀ և այլն, մի ծաղկով գարուն չի գալիս։ Թող մասիսցին դատի»,- ասաց մեր զրուցակիցը։ Իսկ մասիսցին, Օհանյանի խոսքով, տեսնում է այս խախտումները։ «Եթե չտեսներ, դա իր ամենօրյա քննարկման թեման չէր լինի։ Իհարկե, տեսնում է»,- ասաց նա։
Նկատենք, որ չնայած Կարապետ Օհանյանը ԲՀԿ-ական է, սակայն նա Մասիսում ինքնաառաջադրվել է, այլ ոչ թե կուսակցությունն է առաջադրել։ Նա, սակայն, մեզ հետ զրույցում ասաց, որ ԲՀԿ-ն սատարում է իրեն այս ընտրություններում։