Ռուսաստան-Թուրքիա-ՆԱՏՕ հարաբերություններ, Ռուսաստան-Թուրքիա մերձեցման օգուտներն ու վնասները Հայաստանի համար: Արցախյան հիմնախնդիր, կոմպրոմիսային քննարկում. այս թեմայով այսօր Հայելի ակումբում հրավիրված ասուլիսի ժամանակ «Կովկասի ինստիտուտի» տնօրեն, քաղաքագետ Ալեքսանդր Իսկանդարյանը նշեց, որ 2007 թվականից հետո ԼՂ բանակցային գործընթացում ոչինչ չի փոխվել: Այդ ժամանակվանից քննարկում են Մադրիդյան սկզբունքների տարբերակներ:
«Միշտ էլ խոսվել է փոխզիջումների մասին: Ուրիշ բան է, որ հիմա անիմաստ է այն քննարկելը: Հայաստանում և Ադրբեջանում տարբեր իրավիճակներ են, տաբեր կերպ են հարցը քննարկում: Եթե Հայաստանում բաց խոսում են այս մասին, Ադրբեջանում փոխզիջումների մասին բաց չեն կարող խոսել»,– նշեց քաղաքագետը:
Ըստ Ալեքսանդր Իսկանդարյանի՝ պետք չէ ուշադրություն դարձնել բանակցություններից հետո արվող հայտարարություններին, քննարկումներին, որովհետև իրականում հիմա առավել շատ բանակցություններ են ընթանում ոչ թե բանակցային գործընթացում ինչ-որ ելքեր գտնելու համար, այլ առավել շատ իրավիճակի սրումը բացառելու համար:
Անդրադառնալով տարածքներ հանձնելու մասին լուրերին, նկատեց, որ տարբեր թվեր են ներկայացվում՝ հինգ, վեց, երկու շրջաններ հանձնելու մասին, «Ինձ թվում է, որ ապրիլյան պատերազմից հետո այս մասին մտածելը շատ բարդ է, ոչ իրատեսական»:
Նրա խոսքով՝ Ադրբեջանը հակված չէ անգամ վերջին հանդիպումներում ձեռքբերված՝ սահմանին վերահսկողություն սահմանելու պայմանավորվածությունը կատարելու: «Ադրբեջանն ընդհանրապես պատրաստ չէ փոխզիջումների, նրա համար բանակցային գործընթացում Ղարաբաղի ներգրավման մասին խոսք լինել չի կարող»,- նշեց քաղաքագետը:
Մանրամասները՝ տեսանյութում: