«Արվեստի մարդիկ պետք է միշտ էլ իշխանությանը ոչ թե հակառակվելու, այլ զգոն պահելու համար նրանց մատնացույց անեն սխալները, վրիպումները: Արվեստի մարդիկ իրենց բնույթով միշտ ընդդիմություն են, ամբողջ աշխարհում է այսպես,- «Առաջին լրատվական»- ի հետ զրույցում ասաց երգիչ, երգահան Արտավազդ Բայաթյանը:
«Միշտ խոսվում է այն մասին, թե ինչն է մեզ խանգարում, ինչ է պետք, բայց ոչ ոք չի խոսում իր անձնական պատասխանատվության մասին: Մենք պետք է հասկանանք, որ այս երկրում յուրաքանչյուրն իր երկրի տերը պիտի լինի, որ սա մեր երկիրն է, որ մենք պատասխանատու ենք մեր երկրի համար, մենք կարող ենք այս երկիրը կառավարել, պարտադիր չէ, որ ինչ-որ մեկը դրսից գա, մեզ ցույց տա, թե ինչպես կառավարենք: Մենք կարող ենք մեր երկիրը պաշտպանել, ամենևին կարևոր չէ դաշինքների մեջ մտնել, «եղբայրություն մինչև մահ» սկզբունքը շատ վտանգավոր է, կարող ենք ունենալ բարեկամներ»,- ընդգծեց երգիչը:
Ա. Բայաթյանի դիտարկմամբ՝ պայմանագրային հարաբերությունը մեր ավտանգության երաշխիքը կարող է լինել. «Մենք անարդարացի զոհաբերություններ ենք անում, ինչ է թե մենք ունենք «ախպեր», մանավանդ, որ մեր «եղբայրն իր հոգևոր եղբորը» գտել և դաշինք է կազմում նրա հետ: Հույս ունենալ, որ մեր նկատմամբ արդար կլինեն, դա առնվազն միամտություն է, իսկ եթե պայմանագային հարաբերություն է, ապա եթե շրջանցեն, դու էլ կշրջանցես»:
Ա. Բայաթյանի խոսքով՝ ամեն ինչ փոխվել է, երկրագունդը փոքրացել է, բոլոր երկրներն իրար են մոտեցել և վտանգը բոլորին է սպառնում. «Մենք պետք է կողմնորոշումներ ունենանք: Մենք պետք է շատ լավ կրթություն ստացած մասնագետներ ունենանք, նոր, թարմ գիտելիքներով մասնագետներ, ովքեր գիտեն, թե ինչ է կատարվում աշխարհում և ինչպես կարելի է առաջ շարժվել, հակառակ դեպքում կլինենք անտեսված, արհամարհված, ոչ զարգացած երկիր, վերջում կարող ենք նաև կորցնել մեր պետականությունը»:
«Առանց հարևանների հետ լավ պայմանագրային հարաբերություններ ունենալու մենք երկար ժամանակ շնչելու օդ չենք ունենա»,- ընդգծեց Ա. Բայաթյանը:
Մանրամասները՝ տեսանյութում: