«Ես մինչև այս պահն էլ վստահ չեմ, որ Պերմյակովին առաջադրված մեղադրանքը ամբողջական է»,-«Առաջին լրատվական»-ի հետ զրույցում ասաց Սոցիալական արդարություն ՀԿ ղեկավար, քրեական արդարադատության հոգեբան Արշակ Գասպարյանը։ «Ինձ համար դեռ բացահայտված չէ սպանության դրդապատճառները։ Մոտիվը մինչև հիմա էլ՝ դատավարության ավարտը պարզ չէ։ Ինձ համար շարունակում է հակասական մնալ այն, թե ինչպես մարդը 20 տարեկանում դատապարտվում է ցմահ ազատազրկման, այլևս արևի լույս չի տեսնելու, ոչ մի բառ չի ասում դեպքի վերաբերյալ։ Այդպես չի լինում»,- ասաց Գասպարյանը։
Վերջինիս խոսքերով՝ ցանկացած դեպքում անհրաժեշտ է կատարվածը համադրել կատարողի անձնային առանձնահատկությունների հետ։ Հենց ստացվի դրանց միաձուլումը, պարզ կդառնա, թե ինչու է կատարվել տվյալ արարքը, հենց այդ անձանց կողմից։ «Բայց դժվար է պատկերացնել, թե ինչպես կարելի է անձին դատապարտել ցմահ ազատազրկման այդպես էլ չպարզելով արարքի դրդապատճառը։ Ես էլ կարող եմ հիմա կանգնել և հայտարարել, որ հոկտեմբերի 27-ը ես եմ պատվիրել։ Քենեդուն էլ եմ ես սպանել։ Թող ինձ դատեն։ Եվ վերջում էլ, որ քննիչը հարցնի, թե ինչու եմ դա արել՝ կասեմ, որ ձեր գործը չի։ Բայց քրեական արդարադատությունը կախված չէ արարքի վայրագությունից»,- նկատեց մեր զրուցակիցը։
Գասպարյանի դիտարկմամբ՝ հեշտ չէ անձի անձնային առանձնահատկությունները և կատարված արարքը համադրել, եթե աշխատում են միայն իրավաբաններ։ Այս գործի համար անհրաժեշտ էր ներգրավվել հոգեբաններ և այլ մասնագետներ, հաշվի առնելով նաև Պերմյակովի պահվածքը։ «Պերմյակովի անտարբեր կեցվածքը կարող է խոսել շատ բանի մասին։ Հա կարող է ունենալ հոգեկան զարգացման հապաղում։ Այլապես ինձ համար հասկանալի չէ, թե ինչպես կարող է լիովին գիտակից մարդը չարձագանքել իր կյանքի հետ կատարվող իրադարձություններին»,- ասաց հոգեբանը։
Արշակ Գասպարյանը չի բացառում, որ Պերմյակովի լռությունը կարող է պայմանավորված լինել արտաքին միջամտությամբ։ Օրինակ՝ դատական նիստից առաջ նրան հոգեմետ դեղեր տալուց մինչև այն վարկածը, որ նա իսկապես այդպիսինն է։
Առավել մանրամասն՝ տեսանյութում։
