Սյունիքի մարզի ընդհանուր իրավասության դատարանում Անդրանիկ Մնացականյանի նախագահությամբ ավարտվել է Արուսյակ Գ.-ի գործի դատական քննությունը:
55-ամյա Արուսյակ Գ.-ին մեղադրանք էր առաջադրվել պոռնկությանը նպաստելու համար՝ ՀՀ քրեական օրենսգրքի 262 հոդվածի 1-ին մասով:
Ըստ մեղադրանքի՝ 2015 թվականի հոկտեմբերի 23-ին ագարակցի Արուսյակը Երևանում ծանոթացել է Ռուզաննա Զ.-ի հետ ու, գույքային օգուտ ստանալու ակնկալիքով, հրավիրել է նրան Ագարակ՝ մարմնավաճառությամբ զբաղվելու:
Ռուզաննան ընդունել է հրավերը և հոկտեմբերի 25-ից մինչև 30-ը, գտնվելով Ագարակում, Արուսյակի ներկայացրած հաճախորդների հետ սեռական հարաբերություններ է ունեցել՝ յուրաքանչյուր հաճախորդից ստանալով 15 հազար դրամ: Այդ գումարից 5 հազար դրամը մարմնավաճառուհին տվել է «միջնորդ» Արուսյակին:
Արուսյակ Գ.-ն ընդունել է մեղքը և միջնորդել է գործը քննել արագացված կարգով:
Դատարանը հաշվի է առել, որ Արուսյակը նախկինում դատված չէ, ամուսնացած չէ, վատառողջ է՝ 2 խմբի հաշմանդամ:
Արուսյակ Գ.-ն մեղավոր է ճանաչվել ՀՀ քրեական օրենսգրքի 262 հոդվածի 1-ին մասով և դատապարտվել է 1 տարի ազատազրկման: Նրա նկատմամբ պայմանական դատապարտություն է կիրառվել ու սահմանվել է 1 տարի փորձաշրջան:
Դատավճիռը չի բողոքարկվել և մտել է օրինական ուժի մեջ: