«Երբ երիտասարդությունը կարևորվում է, դա ուրախացնում է երիտասարդության ներկայացուցիչներին։ Բայց այլ բան է, այդ երիտասարդությունն ակտիվանում է, թե ոչ»,- «Առաջին լրատվական»-ի հետ զրույցում ասաց քաղաքացիական ակտիվիստ Հրայր Կոստանյանը։ Իսկ, թե ինչու չի ակտիվանում երիտասարդությունը, ակտիվիստի խոսքերով՝ կողմնորոշումների դեգերումների մեջ խրված լինելու պատճառով է։ «Երկիրը կարծես բաժանվել է տարբեր ճակատների։ Մի մասը ռուսամետությամբ է տարված, մյուս մասը հորդորում է դեպի Արևմուտք գնալ։ Իմ կարծիքով հենց սա է ամենամեծ խնդիրը։ Ու երբ երիտասադրդը չի կողմնորոշվում, թե դեպի ուր գնա, հայտնվում է փակուղու մեջ»,- հավելեց ակտիվիստը։
Նրա խոսքերով՝ պետք է իսպառ բացառել պռո ու դեմ գաղափարները, փորձել հասկանալ թե ինչ պետություն ունենք, ինչ խնդիրներ կան։ «Անձամբ ես ոչ մի ընտրություն չեմ ուզում անել Ռուսաստանի և Արևմուտքի միջև։ Ես ընտրում եմ Հայաստանը, ես հայամետ եմ։ Միակ ճանապարհը, որը չի քարկոծվի ոչ մեկի կողմից՝ դա հայամետությունն է։ Մենք պետք է իսպառ հրաժարվենք որևէ ուղղություն վերցնելուց»,- ասաց Հրայրը։
Ինչ վերաբերում է ուրբաթ օրվա հանարհավաքին, որի ժամանակ Արմեն Մարտիրոսյանը նշեց, որ իրենք գնում են դեպի Արևմուտք և իրենց պայքարը Ռուսաստանի դեմ է, ապա ակտիվիստը նշեց, որ ինքը և իր ընկերները չեն պատրաստվում մասնակցել այդ պայքարին, որը Հայաստանում ի վերջո հանգեցնելու է քաղաքացիական պատերազմի, քաոսի։
Առավել մանրամասն՝ տեսանյութում: