Ռիոյի 2016թ․ ամառային Օլիմպիական խաղերի արծաթե մեդալակիր Միհրան Հարությունյանն իր ֆեյսբուքյան էջում գրառում է կատարել՝ մեկնաբանելով ստուգատեսը։ Հիշեցնենք, որ Միհրանը բացահայտ կողմնակալ մրցավարության պայմաններում եզրափակչում զրկվեց ոսկե մեդալից, որը բաժին հասավ սերբ Դավոր Շտեֆանեկին։
«Ռիո դե-Ժանյերոյում ավարտվեց 31-րդ ամառային Օլիմպիական խաղերը։ Առաջին բանը, որ ցանկանում եմ ասել՝ շնորհակալությւոն բոլոր այն մարդկանց, ովքեր չամաչեցին իրենց դիրքորոշումը հայտնել Ռիոյի Օլիմպիական խաղերում իմ եզրափակիչ գոտեմարտի մասին։ Շնորհակալ եմ աջակցության և այն բանի համար, որ ամենասկզբից եղել եք իմ կողքին։ Հսկայական աջակցություն եմ զգում ազգիս կողմից։ Նույնը նաև բազմաթիվ մարդկանց կողմից՝ ամբողջ աշխարհից՝ տարբեր ազգի ու հավատքի։
Ամբողջ կյանքս երազել ու գնացել եմ դեպի Օլիմպիական բարձունք։ Այս դժվարին ճանապարհին հսկայական աշխատանք է արվել։ Ռիոյի ճանապարհը լի էր իմ նկատմամբ անարդարություններով, բայց որքան էլ ցավալի լիներ ինձ համար, համբերատար էի ու ոչինչ չէի ձեռնարկում այդ ուղղությամբ՝ սպասելով Ռիոյին։ Հուսով եմ՝ անարդարությունների ժամանակը վաղ թե ուշ կանցնի։ Ցավոք, հրաշք տեղի չունեցավ, և ինձ նորից զրկեցին ոսկե մեդալից։ Այդ քայլը վերջնականապես կոտրեց ինձ, և ես չկարողացա տիրապետել ինձ։
Ամբողջ մարզական աշխարհն իսկապես կփակի՞ աչքերն այս հանցագործության վրա։ Օլիմպիական չեմպիոնի կոչումից զրկվեցի, քանի որ Հայաստանը ոչինչ չի որոշում ըմբշամարտի աշխարհում։ Որոշում են սերբերն ու մյուսները։ Բայց ես հպարտ եմ, որ հայ եմ։ Մենք փոքր, բայց մեծ ազգ ենք։ Աջակցության համար շնորհակալ եմ մարզչական շտաբին, հարազատներիս, բարեկամներիս և իհարկե, ժողովրդին։ Հարյուր տոկոսով պատրաստ էի այս Օլիմպիադային»,- գրել է Միհրանը` տեղադրելով ստորև ներկայացված լուսանկարը։