«Առաջին լրատվական»- ի նկարահանող խումը Արարատի մարզի Երասխավան գյուղում էր. սահմանամերձ գյուղի գործարանը՝ «Երասխ» գինու գործարանը թվում էր, թե այս պահին պետք է աշխատանքային բուռն եռուզեռի մեջ լինի, քանի որ ընդամենը մեկ շաբաթ հետո սկսվելու է խաղողի մթերումների ամենաթեժ շրջանը, սակայն դռները կողպված են, գործարանը փակ է: Գյուղացիները կրկին իրենց արտադրանքն իրացնելու խնդրի առաջ են կանգնելու:
Գործարանի տնօրեն Ռազմիկ Թևանյանի խոսքով՝ 94թ-ի համեմատությամբ խաղողի արտադրությունը 5-6 անգամ նվազել է, քանի որ ժամանակին խաղողը չեն ընդունում, մթերված խաղողի գինը ժամանակին չեն տալիս խաղողագործներին:
«Իրական պատկերը պետք է ներկայացնել, թվեր հնչեցնելը ոչ մի օգուտ չի տալիս ո՛չ Հայաստանի տնտեսությանը, ո՛չ մեր պետությանը, ո՛չ էլ ժողովրդին,-նկատում է Ռ. Թևանյանը: – Մենք պետք է իմանանք, թե իրականում ինչքան խաղող կա մեր երկրում և մթերման ուղղությամբ համապատասխան միջոցներ ձեռք առնենք»:
Այս տարի խաղողը չենք մթերելու,- նշեց գործարանի տնօրենը,- որովհետև փող չունենք, անցած տարի ընդունված խաղողի դիմաց 54 միլիոնը դեռ պարտք ենք գյուղացուն: Անցած տարի ես մարդկաց ասում էի, որ մեկ-երկու տարվա մեջ հազիվ կարողանամ վճարել, ասում էին՝ ոչինչ, խաղողը դատարկում էին ու շնորհակալություն հայտնում և ասում՝ փրկեցիր մեզ: Բա անհարմար չի՞»:
Ռ. Թևանյանի կարծիքով՝ պետությունը պետք է աջակցի, պետք է գնի խաղողը. «Ոչ մի նորմալ երկրում վերամշակող ձեռնարկությանը 14-16 տոկոսով դոլարային վարկ չեն տալիս»,- դժգոհեց Ռ. Թևանյանը՝ հավելելով, որ մեզ մոտ ընդհանուր սխալ մոտեցում է ցուցաբերվում գյուղատնտեսությանը:
Մանրամասները՝ տեսանյութում: