Կառավարության օգոստոսի 11-ի նիստում որոշում կայացվեց Կոտայքի մարզի Աբովյան քաղաքի Հայ և ռուս ժողովուրդների բարեկամության թանգարանի մասնաշենքի վերակառուցման համար 17 միլիոն 540 հազար դրամ հատկացնելու մասին: Իրականում կառավարությունն այսքան գումարը հատկացնում է ոչ թե թանգարանի, այլ հայ և ռուս ժողովուրդների հարաբերությունների նորոգմանը:Կառավարության այս քայլը բազմաթիվ քննարկումների տեղիք է տվել:
«Առաջին լրատվական»- ը զրուցեց Հ. Թումանյանի թանգարանի տնօրեն Նարինե Թուխիկյանի հետ՝ փորձելով հասկանալ, թե կառավարության այս քայլը բխում է մշակութային արժեքները պահպանելու ցանկությունի՞ց, թե՞ իրականում քաղաքական ենթատեքստը գերակշռող է:
Ն. Թուխիկյանի դիտարկմամբ՝ լավ է, որ ինչ-որ մշակութային օջախ է նորոգվում, սակայն սա ակնհայտ քաղաքական քայլ էր՝ մի քիչ զավեշտալի: «Եթե մենք այնքան հարուստ ենք, որ այդքան գումար ենք տալիս թանգարանին, լավ է, բայց եթե այդ գումարը տրվում է այդ թանգարանին, ես կառաջարկեի ռեբրենդինգ անել, փոխել թանգարանի անունը:
Այս ժամանակներում, երբ պատռվեցին բարեկամության բոլոր շղարշները, այդ թանգարանը կարող է կոչվել հայ-ռուսական հարաբերությունների թանգարան՝ Իսրայել Օրիից մինչև Բալայան Զորի: Այդ թանգարանում պետք է ցուցադրվեին Ալեքսանդրապոլի պայմանագիրը, «Կալցո» օպերացիայի մասին պետք է ինֆորմացիա տրվեր, երբ Սումգայիթում կոտորեցին հայերին և սովետական զորքերը հրճվում էին…»,- նշեց Ն. Թուխիկյանը:
«Այսպես էլ պիտի լիներ, մեր բյուջետային ծախսերը շատ դեպքերում հենց բլեֆի վրա է ծախսվում: Իսկ հայ-ռուսական բարեկամությունը բլեֆ է, որում մենք քանիցս համոզվեցինք»,- նշեց Նարինե Թուխիկյանը:
Մանրամասները՝ տեսանյութում: