Փաստաբան Գևորգ Գյոզալյանը, փորձելով գնահատել ոստիկանության գործողությունները ՊՊԾ գնդի գրավման և դրան հաջորդող դեպքերի ժամանակ, նկատեց, որ դրանք գործողությունների շարք են. «Ուստի չի բացառվում, որ մի դեպքում նրանք գործել են իրավաչափ, մեկ այլ դեպքում՝ ոչ իրավաչափ»:
Փաստաբանի խոսքով՝ որպեսզի օրինական լիներ իշխանությունների պահանջը՝ արգելել քաղաքացիների մուտքը ՊՊԾ գնդի տարածք, պետք է հայտարարվեր արտակարգ դրություն, հակառակ դեպքում նրանք իրավունք չունեին սահմանափակելու քաղաքացիների տեղաշարժի իրավունքը. «Ուստի ընդհանուր առմամբ չի կարելի ոստիկանության գործողությունները համարել իրավաչափ»:
Ինչ վերաբերում է կալանավորման դեպքերին, ապա փաստաբանը նկատեց, որ «դատարանները ցույց տվեցին 2008-ի մարտ-ի 1-ի դեպքերից հետո իրենց դեմքը: Այսինքն՝ ոչինչ չի փոխվել: Սա խայտառակություն էր»:
Ոստիկանության գործողություններին ԵԱՀԿ երևանյան գրասենյակի հայտարարությանը անդրադառնալով՝ մեր զրուցակիցը համարում է, որ այդ գնահատականները Հայաստանի համար կարևոր են այնքանով, որքանով ԵԱՀԿ-ն բազմաթիվ ծրագրերով ֆինանսավորում է իրականացնում նույն այդ ոստիկանությանը. «ԵԱՀԿ-ի գնահատականը ինձ՝ որպես քաղաքացու, անկեղծ ասած, չի հետաքրքրում»:
Լուսանկարը՝ Photolure-ի