«Ես տեղյակ եմ, որ Արայիկ Խանդոյանն ուզում է իր թեկնածությունն առաջադրի։ Շատ ուրախ եմ դրա համար։ Նախքան էս վերջին դեպքերը ես ու Արայիկ Խանդոյանը մի թիմ ենք եղել, որպեսզի իրավիճակ փոխենք, քանի որ կոռուպցիան էս երկրում ահռելի չափերի է հասել»,- «Առաջին լրատվական»-ի հետ զրույցում ասաց Ծաղկահովիտ համայնքի համայնքապետի պաշտոնում առաջադրված ԲՀԿ-ական Աշոտ Հակոբյանը։ Նա խուսափեց գնահատական տալ վերջին դեպքերին, քանի որ իր խոսքերով՝ ինքը չէր պատկերացնի, որ Արայիկ Խանդոյանը զենք կբարձրացներ հայ մարդու, հայ ոստիկանի դեմ։ «Բայց սա ստեղծված իրավիճակի արտացոլում էր, արտահայտություն էր, երբ մի խումբ տղաներ ձայն բարձրացրեցին ի լուր աշխարհի»,- ասաց Հակոբյանը։
Նշենք, որ Ծաղկահովիտ համայնքում առաջադրվել է նաև Աշոտ Հակոբյանի հարազատ եղբայրը։ Հակոբյանը նշեց, որ պատրաստ է Խանդոյանի համար ինքնաբացարկ հայտնել և չսատարել եղբորը։ «Ես իմ եղբորը չեմ սատարել նաև նախորդ ընտրությունենրին։ Բայց, եթե Արայիկ Խանդոյանը առաջադրվում է, ապա ես պատրաստ եմ իմ թեկնածությունը հանել և իմ բոլոր ջանքերը ներդնել նրան սատարելու համար»,- ասաց Հակոբյանը։
Վերջինիս խոսքերով՝ այն մարդը, որ շատ երիտասարդ տարիքում պատրաստ է եղել իր անձը դնել, իր արյունը դնել հողի ազատագրման, Արցախի փրկության, միավորման համար, ապա նա սրբություն է ազգի համար։ «Արայիկը ինձ համար այդպիսինն է։ Նա իմ փոքր եղբայրն է։ Ես այսօր շատ եմ ցավում, որ հիմա նա անազատության մեջ է, բայց հուսով եմ, որ արդարությունը կհաղթի և նա դուրս կգա։ Իսկ էս երկրում փոփոխությունները կսկսեն Ծաղկահովտից՝ Արայիկի առաջադրմամբ»,- նկատեց մեր զրուցակիցը։
Առավել մանրամասն՝ տեսանյութում։