Դեռ նախորդ տարվա հուլիսից Թուրքիայում քաղաքացիական պատերազմ էր սկսվել, որի հետևանքը պետք է հեղաշրջման փորձը լիներ. այս մասին «Թուրքիայում հեղաշրջման ձախողված փորձը և դրա հետևանքները Հայաստանի համար» թեմայով քննարկման ժամանակ ընդգծեցին բանախոսները:
ՀՅԴ բյուրոյի անդամ, Հայ դատի և քաղաքական հարցերի գրասենյակի ղեկավար Կիրո Մանոյանը նշեց. «Տեղեկություններ կան, որ Թուրքիայի իշխանությունները նախապես իմացել են հեղաշրջման փորձի մասին և միտումնավոր չեն կանխել: Թույլ են տվել, որպեսզի ձախողեն այն, իրականում հաշվեհարդար են տեսում այն մարդկանց հետ, որոնք այս կամ այն պատճառով իրենց հետ չեն: փաստեր են եղել, որ իշխանությունները համապատասխան տեղեկություն են ունեցել հեղաշրջաման փորձի մասին»:
«Թուրքիան իր գործողություններով, հակահայկական կեցվածքով, Ղարաբաղյան հարցում Ադրբեջանի բացահայտ աջակցությամբ՝ արդեն իսկ մարտահրավեր է Հայաստանի համար»,- նկատեղ ԱԺ արտաքին հարաբերությունների մշտական հանձնաժողովի պատգամավոր Շիրակ Թորոսյանը: Նրա խոսքով՝ Թուրքիայի իրողություններն ուսումնասիրվում են ՀՀ-ում` փորձ անելով հետևություններ կատարել դրանից. «Ոչ վաղ անցյալում Էրդողանը հայտարարում էր զրո խնդիր հարևանների հետ քաղաքականության մասին, սակայն հետագայում պարզվեց, որ Էրդողանն այդ քաղաքականությամբ ընդամենն ուզում է տարածաշրջանում իր ազդեցությունն ուժեղացնել ու կայանալ որպես տարածաշրջանային գերտերություն, քանի որ ոչ թե հարևանների հետ զրո խնդիր, այլ փաստորեն բոլորի հետ խնդիր քաղաքականություն է վարում»:
ՄԱՀՀԻ-ի նախագահ Ստյոպա Սաֆարյանը նշեց, որ դեռ 2000-ականների կեսերից Թուրքիայում սկսվել էր մի գործընթաց, որի առաջնային զոհերը թուրք զինվորականները դարձան. «Այն ժամանակ Թուրքիան մի պետություն էր, որը շատերին թվում էր թե եվրոպական ամբիացիաներ ունի, սակայն հետագայում պարզվեց, որ Թուրքիայի համար կոնֆլիկտները տակտիկական ցատկահարթակ են թռնելու Կովկաս, ինչպես օրինակ ղարաբաղյան խնդրում խառնվելու ցանկությունը: Մարդիկ հստակ ասում են, որ իրենց համար միջոց է կոնֆլիկտը»: Ս. Սաֆարյանի գնահատմամբ՝ ռուս-թուրքական հարաբերությունների ջերմացումը թունավորելու է ռուս-հայկական հարաբերությունները. «Պետք է ուշադիր լինենք երկու տարածաշրջանների նկատմամբ`Ուկրաինա և Մերձավոր Արևելք, որտեղ ռուսական շահերը չափազանց կենսական են, իսկ մեր տարածաշրջանում ձևավորվում է Արևմուտքից աբիժնիկների ակումբ`ՌԴ, Ադրբեջան, Թուրքիա»:
Ստյոպա Սաֆարյանի դիտարկմամբ` ներկայիս Թուրքիան շատ ավելի վտանգավոր է տարածաշրջանի և, մասնավորապես, Հայաստանի համար, քան կարող էր լինել հեղաշրջման հետևանքով առաջացած Թուրքիայի պարագայում, քանի որ այսօր ընդգծված հակաարևմտյան տրամադրություններ են իշխում այնտեղ: «Մեր աքիլլեսյան գարշապարը Ղարաբաղյան հարցն է, ուստի ՀՀ-ն պետք է միշտ մտահոգվի ռուս-թուրքական սիրախաղից»,- ընդգծեց Ս. Սաֆարյանը:
Մանրամասները՝ տեսանյութում: