«Ժառանգություն» կուսակցության փոխնախագահ Արմեն Մարտիրոսյանը, ով նախօրեին գրավի դիմաց ազատ արձակվեց, այսօր լրագրողների հետ հանդիպման ժամանակ նշեց, որ իրեն ձերբակալելը անհիմն և ապօրինի էր:
«Ոչ մի հիմք չկար, ամբողջովին ապօրինի էր, քաղաքական հետապնդում էր: Տեսել եք՝ քարը ձեռքին ոստիկանությունից ինչ էին իրականացնում, ինչ խմբավորումներ էին գործում ոստիկանների հետևում, քաղաքացիական անձինք՝ ձեռքներին տարբեր տեսակի ձողեր: Այս ամենը դուք արձանագրել եք, ինչի համար շնորհակալ եմ, հենց դրա շնորհիվ ապացուցվել է իմ ու մնացած քաղբանտարկյալների անմեղությունը: Քրեական գործ հարուցելը ապօրինի, շինծու, քաղաքական հաշվեհարդար տեսնող քայլ էր, ոչ ավելին»,- նշեց Արմեն Մարտիրոսյանը:
«Ժառանգություն» կուսակցության փոխնախագահը շնորհակալություն հայտնեց բոլոր նրանց, ովքեր այս ընթացքում սատարել են իրեն: Այնուհետև անդրադառնալով Նիկոլ Փաշինյանի 1in.am-ի հետ հարցազրույցում հնչեցրած հարցադրումներին՝ Արմեն Մարտիրոսյանը նշեց, որ անթույլատրելի էր պատգամավոր Նիկոլ Փաշինյանի գնահատականը: «Ես երբեք ինձ թույլ չեմ տվել որևէ կալանավորվածի հետ կապված հարցադրումներ հնչեցնել, որքան էլ հիմնավոր լինեն, բայց այս պարագայում ինքը, ցավոք, իմ մասին խոսքեր ասաց, որոնք ոստիկանության ներկայացուցիչներ էին ցուցմունքներում գրել և դրանք իրականությանը չեն համապատասխանում, ընդ որում որոշ հարցադրումներ էր արել, որոնք նույնիսկ ոստիկանները և իշխանության ներկայացուցիչները չեն արել»,- նշեց Ա. Մարտիրոսյանը՝ ընդգծելով, որ ՊՊԾ գունդ գնալու և այնտեղ մարդկանց տանելու ցանկություն երբևիցե չի ունեցել:
«Եթե ես աում եմ սասնա ծռերը և ժողովուրդը պետք է միանան , իրենք կարող են հասկանալ էլեկտրական զոդում կամ սուպերսոսնձով իրար կպնել»,- ասաց Ա. Մարտիրոսյանը և հավելեց, որ ելույթներում իր ասածի իմաստն այն է եղել, որ «Սասնա ծռեր»- ը պետք է ազատ լինեն և ժողովրդի հետ լինեն:
««Սասնա ծռեր»- պահանջները քաղաքական են, և քաղաքական համակարգող խմբի անդամների պահանջները բացառապես եղել են քաղաքական պահանջների ձևակերպումը և դրանց լուծման վերաբերյալ քաղաքական լուծումներ առաջարկելը»,- ընդգծեց Ա. Մարտիրոսյանը:
Մանրամասները՝ տեսանյութում: