Ինչպես հայտնի է, Ռուսաստանի պաշտպանության նախարար Սերգեյ Շոյգուն այցելել էր Ադրբեջան, որտեղ քննարկվել էր այդ երկիր զենքի հետագա մատակարարման հարցը:
«Ռազմինֆո» կայքի համակարգող Կարեն Վրթանեսյանն այս առնչությամբ ասաց, որ այդ այցը Ադրբեջանն այնպես ներկայացրեց՝ կարծես Շոյգուն միայն այդ երկիր էր այցելել. «Մինչդեռ հաջորդ օը Շոյգուն եկավ նաև Հայաստան՝ ՀԱՊԿ պաշտպանության նախարարների նիստին»:
Մեր զրուցակցի կարծիքով՝ ըստ ամենայնի, Ադրբեջանում բացվելու է ուղղաթիռների վերանորոգման կենտրոն. «Իսկ ռազմական տեխնիկայի մատակարարման ամենաթեժ ժամանակամիջոցը, կարծում եմ, արդեն անցել է: Այս պահին Ադրբեջանը նույնիսկ այդքան գումար էլ չունի՝ կապված նավթի գների անկման հետ, որպեսզի լրացուցիչ շատ խոշոր սպառազինություն գնի»:
Համեմատելով Հայաստանին և Ռուսաստանին մատակարարված սպառազինությունը՝ որքանո՞վ են դրանք մրցունակ՝ հարցին Կարեն Վրթանեսյանը պատասխանեց, որ անիմաստ է ամեն ինչում կապկել Ադրբեջանին. «Օրինակ՝ մեզ համար շատ ավելի նպատակահարմար է արդիականացնել մեր ունեցած տանկերը, քան գնել T-90, որը նույնիսկ ռուսական բանակում չի կիրառվում: Այսինքն՝ մեր դեպքում ընտրվում է արդյունավետությամբ և գնի համադրությամբ ամենալավ ապրանքը»:
Արցախից վերջերս վերադարձած մեր զրուցակիցը տեղեկացրեց, որ այս պահին առաջնագիծը ակտիվորեն կահավորվում է հատուկ տեխնիկայով՝ մշտադիտարկման համակարգեր, գիշերային տեսասարքեր, գիշերային հրազենային նշանոցներ, իրականացվում են շատ մեծ ծավալի ինժեներական աշխատանքներ, կառուցվում են նոր և անվտանգ ճանապարհներ, դիրքերում քաշում են խմելու ջուր:
Կարեն Վրթանեսյանը չի կիսում այն կարծիքը, որ նմանատիպ աշխատանքները սկսեցին կատարվել միայն ապրիլյան պատերազմից հետո: «Սա լուրջ միջոցներ պահանջող աշխատանք է, և այդ ֆինանսական միջոցների հավաքագրումը պետք է շարունակվի՝ աշխատանքները շարունակելու համար»:
Ինչ վերաբերում է Արցախի հողերի հանձնման թեմային, ապա Կարեն Վրթանեսյանը այս խոսակցություններում նկատում է նախընտրական մոտիվներ:
«Այդ թեմայի նման կերպ շահարկումը, բնականաբար, լավ չի ազդում մթնոլորտի վրա, առավել ևս, երբ այդ ազատագրված տարածքում մարդիկ են բնակվում, և այդ բնակիչների մոտ, բնականաբար, կարող են առաջանալ մտահոգություններ: Ուստի այդ հարցի շահարկմանը ես բացասաբար եմ վերաբերվում:
Արցախում ես հող հանձնելու նշույլներ չեմ տեսել: Ես տեսել եմ, որ մարդիկ պատրաստ են վերադարձնել կորցրած դիրքերը և անհրաժեշտության դեպքում առաջ գնալ»,- ասաց Կարեն Վրթանեսյանը: