Գյումրիում սպանդի ենթարկված Ավետիսյանների ընտանիքի իրավահաջորդների դատապաշտպանները բոյկոտել են դատական նիստը:
Ի պատասխան հարցի՝ բոյկոտը կապված է միջնորդության մերժման հե՞տ, փաստաբան Երեմ Սարգսյանն ասաց. «Ըստ էության կապված է ամբողջ ընթացքի հետ, ուղղակի սա եղավ վերջին կաթիլը»:
Նրա խոսքով՝ այս ամբողջ գործընթացը խախտում է տուժող կողմի իրավունքները. «Եթե դատարանը պետք է մերժի տուժող կողմի միջնորդությունները՝ ուղղված տուժողների վնասների վերականգնմանը կամ ռուսական կողմի գործողությունների բացահայտմանը, ըստ էության այլևս տուժող կողմը իրական անելիք չի կարող ունենալ, որովհետև ակնհայտ է, որ մյուս բոլոր միջնորդությունները ևս մերժվելու են»:
Փաստաբանը չի կասկածում, որ մեղադրական դատավճռի դեպքում կտրվի ցմահ ազատազրկում. «Ուստի մեր հիմնական խնդիրն այն էր, որպեսզի վերականգնվի տուժող կողմի բարոյական վնասը և բացահայտվեն ռուսական կողմի պաշտոնատար անձանց անգործությունը և տեղի ունեցածի պատճառները: Օրինակ՝ եթե Պերմյակովին Ռուսաստանում թույլ չեն տվել զենք կրել, այստեղ թույլ են տվել, եթե Պերմյակովը այնտեղ հոգեկան խնդիրների համար բուժում է ստացել, այստեղ ռուսական ռազմաբազայում ճանաչել էին ծառայության համար պիտանի»:
Փաստաբանը շեշտեց, որ իրենց նպատակն էր կանխարգելել նման դեպքերի հնարավոր կրկնությունը, մինչդեռ նրա համոզմամբ՝ դատարանը միայն անդրադառնալու է այն հարցին, թե հիմնավո՞ր էր արդյոք նրա արարքը, և ինչ պատիժ պետք է նշանակել:
«Սակայն պետք էր վեր հանել նաև ռուսական կողմի պատասխանատվության հարցը, և այս վնասի փոխհատուցումը գուցե կզգոնացներ ռուսական կողմին: Իսկ եթե դատարանը չի բավարարելու մեր այս միջնորդությունները, ուրեմն մենք տուժողների շահերի առումով այլևս անելիք չունենք, ուստի և հրաժարվեցինք մասնակցել դատական նիստերին, որովհետև այդ մասնակցությունն այլևս կրելու էր ձևական բնույթ»,- ասաց Երեմ Սարգսյանը:
Ի պատասխան շրջանառվող կարծիքների, թե Պերմյակովը ունեցել է հանցակիցներ, մեր զրուցակիցն ասաց. «Դատաքննական որևէ ապացույց չկա, որը կհուշի, թե այլ անձինք ևս մասնակից են եղել, չկա նաև ապացույց, որը կհուշի, թե Պերմյակովը չէր կարող միայնակ այս հանցագործությունը կատարել»:
Փաստաբանը շեշտեց՝ թեև գործը հանձնվեց հայկական կողմին, բայց ռուսական կողմի հետ կապված գործողությունները այդպես էլ ազատորեն չիրականացվեցին: