Քաղաքական վերլուծաբան Ռիչարդ Կիրակոսյանը Ռուսաստանի և Թուրքիայի նախագահներ Վլադիմիր Պուտինի և Ռեջեփ Թայիփ Էրդողանի՝ օգոստոսի 9-ին Սանկտ Պետերբուրգում կայացած հանդիպման վերաբերյալ դիտարկել է երեք կարևոր գործոն:
Նրա խոսքով՝ հանդիպումն ավելի շատ երկու երկրների նախագահների հաշտեցման հնարավորություն էր, քան երկու պետությունների մերձեցման:
«Սա շատ կարևոր կետ է, քանի որ չնայած հարաբերություններում ճգնաժամի պատճառ հանդիսացավ 2015 նոյեմբերին Թուրքիայի կողմից ռուսական ուղղաթիռի խոցումը, այնուամենայնիվ, դրա հիմքում ավելի անձնական խնդիր կար՝ պայմանավորված երկու նախագահների «տիտանական «Ես»-երի» բախումով: Սա բացատրում է ճգնաժամի լարվածությունը, սակայն նաև այն, որ ճգնաժամը տևական էր, և ավելի հեշտ էր այս դեպքում վերականգնել հարաբերությունները»,-«Արմենպրես»-ի հետ զրույցում նշել է վերլուծաբանը:
Ռիչարդ Կիրակոսյանը հատկանշական է համարում նաև հաշտեցման համար ընտրված ժամանակահատվածը, որը թերևս նաև պայմանավորված էր Թուրքիայի ձախողված հեղաշրջման փորձով:
«Սակայն ռուս-թուրքական մերձեցման հիմքում ընկած իրական պատճառը Թուրքիայի նախագահի ապաշխարելու քաղաքականությունն է, ինչպես նաև տնտեսական խնդիրները: Թուրքիայի տնտեսական խնդիրները տարան դեպի անկման առևտրի և զբոսաշրջության ոլորտներում, ընդհատվեցին մի քանի խոշոր երկկողմ ծրագրեր շինարարության և էներգետիկայի ոլորտներում: Ճգնաժամի հետևանքով դադարեցվեցին խոշոր գործարքներ, որոնք առնչվում էին Թուրքիայում ռուսական ատոմակայանի, ինչպես նաև գազատարի կառուցմանը»,-ասել է Ռիչարդ Կիրակոսյանը: