Նավթի երկու հիմնական մակնիշների՝ Brent-ի և WTI-ի գները բարձրացել են 4 տոկոսով՝ նավթային շուկայի կայունացմանն ուղղված միջոցառումների քննարկման պատրաստակամության մասին Սաուդյան Արաբիայի էներգետիկայի նախարար Խալիդ Ֆալիհի հայտարարությունից հետո։ Այս մասին հայտնում է Reuters գործակալությունը։
WTI-ի արժեքը բարձրացել է 1.8 դոլարով՝ հասնելով մեկ բարելի դիմաց 43.49 դոլարի։ Brent նավթի գինը գերազանցել է 46 դոլարը։ Երկու նավթատեսակների համար դա ամենամեծ աճն է եղել ամսվա ընթացքում։
Նախարարը հայտնել էր, որ Միջազգային էներգետիկ ֆորումի շրջանակում ոչ պաշտոնական հանդիպմանը, որը տեղի կունենա Ալժիրում սեպտեմբերի վերջին, կքննարկվեն նավթի շուկայի կայունացման ցանկացած հնարավոր միջոցառումներ։
Վերլուծաբանների կարծիքով՝ նավթի գները փոքր-ինչ կտատանվեն առաջիկա շաբաթներին, սակայն եթե Սաուդյան Արաբիան որոշի չկրճատել արդյունահանումը, գները նորից կարող են փլուզվել։