Հայ-ռուսական համագործակցության միջխորհրդարանական հանձնաժողովի հերթական, 19-րդ նիստի աշխատանքների ընթացքում, որոնք այսօր մեկնարկեցին ԱԺ-ում, արդեն իսկ քննարկվեց, թե ի՞նչ հարցեր են մտնելու հանձնաժողովի հաջորդ՝ 20-րդ նիստի օրակարգ: Հանձնաժողովի համանախագահ, ՌԴ Դաշնային խորհրդի անդամ Նիկոլայ Ռիժկովը լրագրողներին տեղեկացրել է այդ հարցերի մասին, որոնց թվում լինելու է նաև Ղարաբաղյան հակամարտության կարգավորման խնդրի քննարկումը` հիմնված Հայաստանի և Ռուսաստանի ԱԳՆ-ների կողմից տրամադրված փաստաթղթերի ու տեղեկանքի վրա. «Հաջորդ նիստը կկայանա 2011թ. ապրիլին Յարոսլավլում, և կքննարկենք այդ ժամանակահատվածում առկա իրողությունները մեր և ձեր երկրների գերատեսչությունների տրամադրած տեղեկատվության հիման վրա»,- ասել է Ն.Ռիժկովը:
Ռիժկովը ընդգծել է, որ անհանգստացած են ԼՂ խնդրով, և այդ իսկ պատճառով չեն կարող անտարբերությամբ ու կողքից նայել, թե ինչ է կատարվում բանակցային գործընթացում: Թեպետ իրենց դերակատարումը` խորհրդարանական ներգրավվածությունը, այնքան էլ մեծ չէ, քանի որ խնդրով հիմնականում զբաղվում են միջազգային ատյանները, բայց երկու երկրների խորհրդարանականները չեն կարող չմտորել ու չքննարկել ստեղծված իրավիճակը:
Ն.Ռիժկովը հավելել է, որ ճիշտ է, իրենք կարող են քննարկել ու որոշումներ ընդունել հիմնախնդրի վերաբերյալ, բայց «Ես այնքան էլ լավ չեմ պատկերացնում, թե ինչպիսի՞ք կարող են դրանք լինել, քանի որ իրականում միջազգային շատ կազմակերպություններ ու մարդիկ են ներգրավված հակամարտության կարգավորման գործընթացում, այդ իսկ պատճառով ուղղակի պայմանավորվեցինք, որ կդիտարկենք ԱԳՆ-ների ներկայացրած տեղեկանքները»: Իսկ եթե մինչ այդ ժամանակահատվածը խնդիրը լուրջ փոփոխություններ արձանագրած լինի, կամ Աստված մի արասցե, բացասական զարգացումներ լինեն՝ ապա այս հարցում երկընտրանք չկա. «Մենք չենք պատրաստվում ուղղակի կողքից դիտել կամ չտեսնելու տալ, թե ինչպես է գործը հասնում ուժի կիրառմանը… բայց հուսամ, որ բանը դրան չի հասնի»,- նշել է նա:
Ն.Ռիժկովն ընդգծել է, որ շատ բաներ են վկայում այն մասին, որ հակամարտության կարգավորման գործընթացը փակուղի է մտնում, և պարզ չէ, թե ինչպե՞ս դուրս գալ այդ փակուղուց: «Ըստ իս՝ գուցեև կգտնվեն ինչ-որ կոնստրուկտիվ լուծումներ, բայց չպետք է մոռանալ, որ կա նաև հայ ժողովուրդ, և հայտնի չէ, թե ինչպե՞ս նա կընդունի նման լուծումները… Մի խոսքով, իրավիճակը շատ բարդ է»,- հավելել է ՌԴ Դաշնային խորհրդի անդամը: