«Անյպիսի էքսցեսները, ինչպիսին մենք տեսանք հուլիսի 17-ից սկսած, ուղղակի ինքնասպանություն են Հայաստանի համար: Մենք պետք է տարբերենք իշխանությանն ուղղված ընդդիմախոսությունը, ընդդիմադիր կեցվածքը պետության հիմքերին հասցվող հարվածներից, մանավանդ որ մեր շուրջը տեղի է ունենում աշխարհաքաղաքական փոթորիկ, և այդ փոթորկի հետևանքները այսօր կամ վաղը չէ, որ կերևան, դեռ ժամանակ պիտի անցնի, խնդիրն այն է, որ մենք դրանից կարողանաք դուրս գալ առանց կորուստների կամ նվազագույն կորուստներով»,- այս մասին «Առաջին լրատվական»- ի հետ զրույցում ասաց քաղաքագետ Ռուբեն Մեհրաբյանը:
Քաղաքագետի խոսքով՝ Հայաստանին պակասում է ներքին ամրության պաշարը. «Այն ամրության ներուժը, որ մենք ունեինք և կարող էինք ունենալ, այդ ամեն ինչը մսխված է, սլաքը ցույց է տալիս զրո: Այսօր Հայաստանում սպանված է քաղաքականությունը, փորձում են սպանել նույնիսկ քաղաքական միտքը»:
Անդրադառնալով այն արտաքին մարտահրավերներին, որոնց առջև այսօր կանգնած է Հայաստանը, քաղաքագետը նշեց, որ Լավրովի փաստաթղթի առաջքաշումը Կազանյան փաստաթղթի վերակենդանացման անթաքույց փորձ էր՝ բավականին կոշտ և կոպիտ եղանակներով. «Ընդ որում՝ Ռուսաստանը առաջ է տանում ուժային եղանակով՝ Ադրբեջանին միլիարդների զենք է վաճառում և փաստորեն ուժային շանտաժի միջոցով փորձում է Հայաստանից պոկել այդ համաձայնությունը: Մենք տեսնում ենք, որ դա անցնում է Հայաստանի կողմից հնարավոր զիջումների բոլոր կարմիր գծերը, դա անհնարին է»:
Քաղաքագետի կարծիքով՝ այս մարտահրավերները պարունակում են նաև որոշ հնարավորություններ, և մենք պետք է կարողանանք վերագտնել մեզ, փորձել նայել ապագային: Նրա խոսքով՝ այդ քայլերը հնարավոր է անել լիովին դիվերսիֆիկացնելով ներքին քաղաքականությունը:
«Հայաստանը, ցավոք սրտի, ունի ոչ վաղ անցյալի փորձ, մեր երկիրը 100 տարի առաջ այսպիսի աշխարհաքաղաքական փոթորկից դուրս եկավ ցեղասպանված և պետականությունը ձեռք բերելուց հետո արագ կորցրեց»,- մտահոգություն հայտնեց Ռ. Մեհրաբյանը՝ հավելելով, որ մենք իրավունք չունենք պետություն, հայրենիք կորցնելու: «Պետք է սառը դատողություն, ռազմավարական համբերություն, ճշգրիտ հաշվարկներ և ձգտում՝ հասկանալու այն գործընթացները, ինչ կատարվում է մեր շուրջ՝ առանց պատրանքների և առանց ավելորդ տագնապի»,- ընդգծեց քաղաքագետը:
Մանրամասները՝ տեսանյութում:
