Կանադահայ դերասանուհի Արսինե Խանջյանը, ով վերջին օրերի իրադարձությունների ժամանակ ակտիվորեն մասնակցում էր հանրահավաքներին, և նույնիսկ բերման էր ենթարկվել, այսօր «Առաջին լրատվական»- ի հետ զրույցում արտահայտեց իր մտահոգություններն ու դիտարկումները՝ կապված հայաստանյան ներքին իրողությունների հետ:
«Այլևս հնարավոր չէ լուռ մնալ… Այս պահին մեր պարտականությունն է, որ անդրադառնանք նաև Հայաստանի առօրյա հարցերին, կարող են ինձ քննադատել՝ ասելով, որ ես չեմ ապրում Հայաստանում, բայց այսօր հայ ազգը գոյություն ունի թե՛ Հայաստանում, թե՛ պատմական Սփյուռքում… Ես ակամա անդրադարձա այդ ամենին, քանի որ այդ իրողությունը կրեցի իմ մաշկի վրա: Այսօր շատերն են Սփյուռքից ցանակնում, որ ակտիվորեն անդրադառնան այն իրողություններին, ինչ որ Հայաստանի քաղաքացուն է վերաբերում:
Մենք 25 տարվա ընթացքում գործունեություն ծավալեցինք երեք ուղղությամբ՝ Ցեղասպանության ճանաչման, Արցախի հարցի և Սփյուռքից հանգանակություն հավաքելու և բերելու ուղղությամբ:
Սփյուռքը մինչ այժմ հեռու է մնացել, քանի որ մտահոգություն ունի, որ վերջապես պետականություն է ստեղծվել Հայաստանում և եթե թիկունք չլինենք Հայաստանի իշխանությանը, կվտանգենք Հայաստանի գոյատևումը, երկրորդ՝ Սփյուռքը հեռու պահվեց Հայաստանի ներքաղաքական հարցերից, մենք այդ ընդունեցինք, հույս ունենալով, որ կարող են բարեփոխումներ տեղի ունենալ ներքին ուժերի միջոցով և զուսպ պահվածք դրսևորեցինք: Բայց այս պահին հստակ է, որ պետությունը, իշխանությունը ճնշումներ են գործադրում, և մեր իրավունքն է և պատասխանատվությունն է, որ հստակեցնենք թե՛ իշխանությունների և թե՛ ժողովրդի համար, որ մենք կարող ենք թիկունք լինել, որովհետև ունենք ռեսուրսներ Հայաստանից դուրս և անպայման չէ, որ Հայաստանում ապրենք, որ ազգային շահերից ելնելով սատարենք:
Իմ դիտարկմամբ, լսելով ժողովրդի կարծիքները և անհատական արտահայտությունները, այսօր Հայաստանում քաղաքացին չի զգում, որ իշխանությունը լավագույն շահերն է առաջարկում իրեն: Ազատ խոսքի պակաս կա, կոռուպցիայի խնդիր կա, լուրջ աղքատության մեջ է ապրում բնակչությունը, ոստիկանությունը պետք է պաշտպանի ժողովրդին, սակայն ծեծի է ենթարկում, առանց պատճառի ձերբակալում:
Հայաստանից հեռանում են երիտասարդները. ինչո՞ւ է երիտասարդ հայն իր զավակին առնում և արտասահման գնում. պատասխանը հստակ է. այստեղ ապագա չի տեսնում: Այսպես եթե շարունակվի, երկիրը կպարպվի:
«Սասնա ծռեր»- ը բանտարկվեցին, բայց ժողովուրդը չի լռելու… Ժողովուրդը կորցնելու բան չունի և ավելի շատ պետք է պոռթկա»:
Հարցազրույցն ամբողջությամբ՝ տեսանյութում:
