Սմարթֆոններ արտադրող հարավկորեական Samsung-ի մասնաբաժինը հյուսիսամերիկյան շուկայում գերազանցել է Apple-ի մասնաբաժինը 2016-ի երկրորդ եռամսյակում։ Այս մասին ասվում է Strategy Analytics մարկետինգային գործակալության հաշվետվությունում՝ փոխանցում է TASS գործակալությունը։
Գործակալության հաղորդագրությունում ասվում է, որ Samsung Electronics-ի մասնաբաժինը նշված ժամանակահատվածում աճել է 5 տոկոսով՝ հասնելով 32.7 տոկոսի։ Իսկ Apple-ի մասնաբաժինը սմարթֆոների հյուսիսամերիկյան շուկայում կրճատվել է՝ 32.6 տոկոսից հասնելով 24.5 տոկոսի։ Նման իրավիճակ այդ շուկայում դիտվում է երկու տարում առաջին անգամ։
Երրորդ տեղը բաժին է հասել LG Electronics-ին, ոորին ընկնում է շուկայի 16.3 տոկոսը։ Նրան հաջորդում է չինական արտադրող ZTE-ն՝ 9.5 տոկոս ցուցանիշով։ Հինգերորդ տեղում են TCL-ն ու Alcatel-ը՝ յուրաքանչյուրը 4.6 տոկոս մասնաբաժնով։