News Georgia լրատվական գործակալության փոխանցմամբ՝ Չինաստանի Ցզյանսի նահանգի կենտրոն Նանչան քաղաքում բացվել է «Վրացական գինու տուն», որում ներկայացված է Վրաստանի գինեգործության, ենթադրաբար, ավելի քան 8000 տարվա պատմությունը։
«Վրացական գինու տան» 4000 քառակուսի մետր տարածքում կան ցուցասրահ, փորձարկման սրահներ, թանգարան, վրացական ազգային խոհանոցով ռեստորան։
Բացի այդ, Չինաստանի բնակիչները կկարողանան շուտով վրացական գինի գնել նաև առցանց։ Արդեն իսկ ստեղծվել է E-SilkRoad ինտերնետային հարթակ, որի շնորհիվ կիրականացվի գինու վաճառքը։
2016 թվականին Չինաստանը դարձել է վրացական գինու վաճառքի երրորդ հիմնական շուկան՝ Ռուսաստանից և Ուկրաինայից հետո։ 2016 թվականի հունվար-հունիս ամիսներին Վրաստանից Չինաստան է արտահանվել ավելի քան 1.9 միլիոն շիշ վրացական գինի, ինչը 148 տոկոսով գերազանցում է նախորդ տարվա հաշվետու ժամանակահատվածի ցուցանիշը։