«Հիմնադիր խորհրդարան»- ը հրապարակել է Ժիրայր Սեֆիլյանի հայտարարությունը, որում ասվում է. «Ես նախ պետք է հանդիպեմ տղաներին, որից հետո միայն հանդիպեմ Սերժ Սարգսյանի հետ, որի արդյունքում միայն տղաները կարող են զենքը վայր դնել: Ես շարունակում եմ պնդել իմ այս դիրքորոշումը… Ես շարունակում եմ մնալ բաց՝ գործակցելու համար, որի նպատակն է ժամ առաջ կանգնեցնել արյունահեղությունը… Այսօր Հայաստանի հանրապետությունում տեղի ունեցող իրադարձությունների ողջ պատասխանատվությունը ընկնում է Սերժ Սարգսյանի վրա»:
Անդրադառնալով Ժ. Սեֆիլյանի հայտարարությանը և պատասխանելով հարցին, թե արդյոք այս հայտարարությունը կարող է օգտակար լինել ստեղծված իրավիճակի հանգուցալուծման համար, քաղաքագետ Ստեփան Գրիգորյանը «Առաջին լրատվական»- ի հետ զրույցում նշեց, որ այս իրավիճակից դուրս գալու համար կարևորագույն քայլերից մեկը պիտի լինի Ժիրայր Սեֆիլյանին անհապաղ ազատելը: «Հասկանալով պատասխանատվության պահը՝ նա կգնա և կհամոզի «Սասնա ծռեր»- ի տղաներին՝ վայր դնել զենքը և բանակցությունների մեջ մտնել Ս. Սարգսյանի հետ»,- համոզված է փորձագետը: «Սասնա ծռեր»-ը, բարի կամք դրսևորելով՝ ազատեցին ոստիակններին, բայց իշխանությունը նրանց խաբեց, նրանք այսօր ոչ ոքի չեն հավատա՝ բացի Ժ. Սեֆիլյանից, ճիշտը նրան ազատելն է»:
«Մենք այնպիսի իրավիճակ ունենք, որում հայտնվել էր Յանուկովիչը, երբ նրա պաշտոնավարման վերջին ամիսներին նա որոշումներ չէր ընդունում, որոշումներն ընդունվում էին Կրեմլում, և հրահանգ էին տալիս»,- այս կարծիքը հայտնեց մեր զրուցակիցը:
Անդրադառնալով դիտարկմանը, որ իշխանություններն ընդառաջ քայլ արեցին՝ լրատվամիջոցների ներկայացուցիչներին տանելով ՊՊԾ գունդ և նրանց արտահայտվելու հնարավորություն ընձեռելով, Ս. Գրիգորյանը նշեց. «Նախ՝ դա կարճ տևեց: Բացի դրանից՝ ես նկատի ունեմ, որ այն պայմանավորվածությունները, որոնց համաձայն՝ պետք է ինտերնետային մշտական կապ, բժշկական օգնություն, ջուր տրամադրվեր, չկատարվեցին:
Քաղաքագետի դիտարկմամբ՝ «Սասնա ծռերի քայլերը մեծ աջակցություն ունեն հասարակության մեջ և լեգիտիմ են: «Իհարկե սխալ է զենքով պաշարել պետական շենք, բայց եթե դա կատարվում է, դրանից հետո չպետք է ֆորմալ կերպով օրենքի տառից կառչել, քաղաքական որոշումներ ընդունելիս հաճախ ստիպված ես գնալ փոխզիջումների, դա չեն կարողանում ընկալել իշխանությունները,- նշեց Ս. Գրիգորյանը՝ հավելելով, որ իշխանությունները պետք է վերսկսեն բանակցությունները, բայց անկեղծ բանակցություններ պետք է վարեն:
«Երկրորդ վտանգն այն է, որ երբ տղաները բաց թողեցին ոստիկաններին, ինչո՞ւ խախտվեցին պայմանավորվածությունները, ինչո՞ւ շրջափակման մեջ գցեցին, կամաց-կամաց սկսեցին կրակելով՝ հանել շարքերից: Ինչո՞ւ գնացիք այդ ճանապարհով: Դա մեր ուզածով չէ, նույնիսկ իշխանությունների ուզածով չէ, դա Կրեմլի ուզածով է»,- ընդգծեց քաղաքագետը:
Ս. Գրիգորյանի կարծիքով՝ այն փաստը, որ Հայաստանում գրեթե անհնար է խաղաղ ճանապարհով, քաղաքական պայքարով, ընտրություններով իշխանափոխության գնալ, դա բերեց նրան, որ հասարակության մեջ գտնվեցին մարդիկ, որոնք որոշեցին ուժով գնալ այդ քայլին:
Քաղաքագետի խոսքով՝ այս օրերի լարվածությանը վերջ դնելու համար, բացի Սեֆիլյանին ազատելուց, իշխանությունները պետք է հանդես գան և հայտարարեն, որ Ղարաբաղի հարցով ոչ մի տարբերակ չի քննարկվում:
«Մենք խոսում էինք այն մասին, որ չպետք է Ղարաբաղի հարցը քննարկվի առանց ԼՂՀ ներկայացուցիչների, մինչդեռ այսօր ղարաբաղյան հակամարտության հարցը լրջագույն մակարդակներում քննարկվում է առանց Հայաստանի ներկայացուցիչների,- մտահոգություն հայտնեց քաղաքագետը,- իշխանությունները միտումնավոր գնում են իրավիճակի սրմանը, դա Ռուսաստանի պլանն է՝ թուլացնել Հայաստանը… և հետո իշխանությունները կգան կասեն՝ ինչպե՞ս կարող էինք պահել Ղարաբաղը»:
«Պատասխանատվության պահը եկել է, – նշեց մեր զրուցակիցը»,- իշխանությունը փորձում է ոչնչացնել ժողովրդավարության ծիլերը, արտաքին կառավարման հանձնվելու վտանգը շատ մեծ է: Հանրահավաքների կազմակերպումն իմաստ ունի և անհրաժեշտություն է՝ դրսի կառավարումը թուլացնելու համար»:
Նրա խոսքով՝ Ղարաբաղը կարելի է կորցնել տարբեր ձևերով, նաև՝ վատ կառավարմամբ: «Մենք կառավարումը հանձնեցինք Ռուսաստանին»,- նշեց Ստեփան Գրիգորյանը՝ հավելելով, որ անհրաժեշտ է արագ փոփոխություններ կատարել:
Մանրամասները՝ տեսանյութում:
