«Էս ո՞ւր ենք հասել, որ նույնիսկ զուտ մարդկային առումով, եթե անգամ հաշվի չառնենք, որ թղթակից է, ինչ-որ մեկը կարող է ձեռք բարձրացնել երիտասարդ աղջկա վրա»,- անդրադառնալով Սարի թաղում, Խորենացի փողոցում նախօրեին ստեղծված իրավիճակին, բազմաթիվ քաղաքացիների բերման ենթարկելու և բռնություն կիրառելու դեպքերին և գնահատելով լրագրողական հանրույթի ներկայացուցիչներին ծեծի ենթարկելու փաստը՝ «Առաջին լրատվական»- ի հետ զրույցում ասաց Հակաճգնաժամային խորհրդի անդամ, Գերագույն խորհրդի պատգամավոր Ալբերտ Բաղդասարյանը՝ հավելելով, որ այդ ժամանակ ինքը համապատասխան ոստիկանական բաժանմունքում է եղել, հասցրել է մի քանի կադրեր տեսնել իրադարձություններից:
«Սա մեծ հարց է, որը բացահայտվեց, երեկ որ ԶԼՄ-ն համարձակվել էր կատարել իր պարտքը՝ գալով լուսաբանելու իրադարձությունները, ենթարկվեց նույն բռնություններին, ինչ ժողովուրդը»,- նշեց Ա. Բաղդասարյանը: Նրա գնահատմամբ՝ այդ ամենը ոչ թե ծրագրված հաշվեհարդար էր միայն լրագրողների նկատմամբ, այլ ծրագրված էր, բայց միայն լրագրողների դեմ չէր ուղղված… Ինչպես Մարտի մեկին, քաղաքացիական հագուստով հանցագործներ էին, անընդհատ շեշտում են, որ ոստիկաններ են, բայց ի՞նչ գիտենք: Այս վարչախմբին, որն իր բնույթով տեռորիստական է, ազատում ենք պատասխանատվությունից՝ ամեն ինչը գցելով ոստիկանության վրա, բայց սրանք ունեն իրենց հանցագործ բանդաները, նրանց համար կարևոր չէ, թե թղթակիցներ են այնտեղ, կանայք են, թե երեխաներ… Հրաման կա՝ ջարդելու, որպեսզի վախեցնեն, նրանք կատարում են»:
Ա. Բաղդասարյանի դիտարկմամբ՝ իշխանությունները ցանկանում են Հայաստանը բաժանել երկու մասի՝ հանել իրար դեմ՝ բաժանի՛ր, որ տիրես սկզբունքով: Նա նշեց, որ Հակաճգնաժամային համակարգող խորհուրդը հայտարարություն է տարածել՝ գնահատելով նախօրեին տեղի ունեցած իրադարձությունները, մասնավորապես նշելով, որ հերթական հանցագործ վերաբերմունքը դրսևորվեց ժողովրդի նկատմամբ:
Ա. Բաղդասարյանը կոչ արեց ԱԺ պատգամավորներին՝ այդ թվում նաև Ն. Փաշինյանին, Զ. Փոստանջյանին, նաև լրագրողներին և մշակույթի գործիչներին՝ մասնակից դառնալ որոշումների կայացմանը, որպեսզի որոշումներն առավել ճշգրիտ լինեն:
«Իշխանություններն ուզում են ճնշել, ասել՝ մեր դեմ խաղ չկա,- նշեց մեր զրուցակիցը,- Սերժ Սարգսյան, դու մի՛ մտածի, որ ավելի հզոր ես, քան Վազգեն Սարգսյանը կամ Վանո Սիրադեղյանը, հիշի՛ր, որ նրանց բարևելիս հայացքդ չէիր բարձրացնում: Մի՛ մտածի, որ ավելի հզոր ես և Ռուսաստանին ավելի պետք ես, քան նախորդներդ էին: Մի՛ այնպես արա, որ երնեկ տաս նրանց»:
Ալբերտ Բաղդասարյանը կոչ արեց կուսակցությունների շարքային անդամներին. «Կա՛մ ստիպեք, որ միանան ժողովրդին, կա՛մ դուք հեռացեք և եկեք միացեք ձեր ժողովրդին»:
Մանրամասները՝ տեսանյութում: