«Այն, ինչ մենք տեսնում ենք ՊՊԾ գնդի գրավումից հետո այս քանի օրվա ընթացքում, խտացված արտահայտությունն է այն իրականության, որտեղ մենք ապրում ենք»,- «Առաջին լրատվական»-ի հետ զրույցում ասաց քաղաքացիական ակտիվիստ Վարդգես Գասպարին։
Նրա խոսքով՝ ստեղծված վիճակը տանում է նրան, որ Հայաստանը շուտով կդառնա կամ հիմա էլ ասոցացվում է Ռուսաստանի հեռավոր մի մարզի կարգավիճակի հետ։ «Բոլոր քայլերը գնում են այդ ուղղությամբ։ Ես ցավալիորեն պետք է ասեմ, որ իմ կանխատեսումներն իրականություն են դառնում։ Ես կարծում եմ, որ մեկ-երկու քայլից հետո Ռուսաստանը հարյուր տարով իր վրա կվերցնի Հայաստանի կառավարումը։ Սա այն ճանապարհն է, որով գնում էինք մինչև այս օրերի ընդվզումը։
Այս ըմբոստությունից հետո իրավիճակ է փոխվել, և շատ կարևոր է, թե ինչպես կհանգուցալուծվի իրավիճակը։ Կախված այդ հանգուցալուծումից՝ կորոշվի նաև Հայաստանի հետագա ճակատագիրը»,- նկատեց Գասպարին՝ հավելելով, որ հենց այս հանգամանքով է պայմանավորված այն, որ ինքը լիովին աջակցում է «Սասնա ծռերի» ապստամբությանը։
«Այս ամենը տեղավորվում է իմ ընկալումների մեջ։ Եթե այսօր ես չպաշտպանեմ այդ տարրական իրավունքները, հաջորդիվ այլ իրավունքների համար չեմ կարող պայքարել»,- ասաց նա։
Քաղաքացիական ակտիվիստը խնդիր է տեսնում նրանում, որ ցավոք, այսօր հասարակությունը չի գիտակցում իր նշածը, այլապես այսօր փողոցում ավելի շատ մարդ կլիներ։ «Ես այստեղ կարևորում եմ քաղաքացի լինելու, քաղաքացի դառնալու հանգամանքը։ Հատկապես այն մարդկանց, ովքեր 2008-ի ճանապարհն են անցել։ Նրանք հատկապես պետք է քայլեր անեն, որ իրավիճակ փոխվի»,- ընդգծեց Գասպարին։
Այն, որ իշխանությունները առ այսօր պատշաճ գնահատական չեն տվել և չեն արձագանքել երկրում ստեղծված վիճակին, Գասպարիի խոսքով՝ ևս մեր՝ քաղաքացիների մեղքն է, նրանց մեղավորությունը ևս կա։ Դա նշանակում է, որ անհրաժեշտ ճնշում չի եղել, նշանակում է՝ քաղաքացիները ինչ-որ տեղ իրենց մեղքի բաժինն ունեն։
Առավել մանրամասն՝ տեսանյութում: