Գնահատելով այսօր Հայաստանում ստեղծված աննախադեպ իրավիճակի պայմաններում իրավապահների գործողությունները՝ «Լուսավոր Հայաստան» կուսակցության խորհրդի քարտուղար Մանե Թանդիլյանը «Առաջին լրատվական»-ի հետ զրույցում իշխանություններին և ոստիկանությանը կոչ արեց դադարեցնել առանց հիմքերի ձերբակալությունները:
«Կարծում եմ՝ իշխանությունը պետք է հստակ դիրքորոշում ունենա՝ ստեղծելու երկխոսության և բանակցությունների աուրա: Նախ՝ պետք է վերականգնվի այն մթնոլորտը, որի շրջանակներում դա հնարավոր է: Եվ առաջին քայլը պետք է անի իշխանությունը»,- ասաց նա:
Մեր զրուցակցի համոզմամբ՝ այլ ելք, քան երկխոսելը, այս պահին ուղղակի գոյություն չունի. «Բավական է, Հայաստանում այլևս չի հեղվելու արյուն, և պետք է վերջ տրվի բռնի մեթոդներով հարցեր լուծելու մշակույթին»:
Մանե Թանդիլյանի կարծիքով՝ եթե իրենք չեն տիրապետում բանակցային արվեստին, պետք է հրավիրեն կոմպետենտ մարդկանց:
«25 տարի շարունակ երկրում հնարավոր չի եղել հասնել իշխանափոխության ընտրությունների ճանապարհով, և այս մարդիկ այդ պրոցեսի հետևանքն են: Այս հարցում մեղավոր են և՛ իշխանությունները, և՛ ընդդիմությունը. միգուցե ընդդիմությանը փոքր հաջողություններով էր պետք կառուցել մեծ հաջողությունը»,- նշեց Մանե Թանդիլյանը:
Այնուամենայնիվ, մեր զրուցակիցը իշխանափոխության լավագույն ձևը համարում է ժողովրդավարական ուղին՝ ընտրությունները:
Մանրամասները՝ տեսանյութում: