«Այս օրերին ձերբակալված անձանց կողմից նրանց պահման վայրից որևէ դժգոհություն չի եղել»,- «Առաջին լրատվական»-ի հետ զրույցում ասաց ՁՊՎ-ներում դիտորդական առաքելություն իրականացնող հասարակական դիտորդական խմբի ղեկավար Սուրեն Իսկանդարյանը։
Նրա խոսքով՝ ոստիկանների հետ բախումների արդյունքում ձերբակալվածները ունեցել են մարմնական վնասվածքներ։
Իսկանդարյանը նշեց, որ իրենք հանդիպել են նաև զինված խմբի անդամ Արամ Հակոբյանի հետ, ով շատ լուրջ մարմնական վնասվածքներ է ունեցել, դեմքի վրա ևս նկատելի վնասվածքներ են եղել։
«Ավելին ասեմ՝ ես ինքնս եմ օգնել, որ նա մահճակալից վեր կենա, կանգնի։ Մեջքի հետ խնդիրներ ուներ, ամբողջ մարմինը ցավում էր։ Արամն ասաց, որ իրեն ծեծել են բռնելուց և տեղափոխելուց, բայց քննիչներին հանձնելուց հետո այլևս խոշտանգում չի եղել»,- ասաց Իսկանդարյանը։
Նա նշեց, որ Արամին ՁՊՎ-ից չէին կարող տեղափոխել «Դատապարտյալների հիվանդանոց»։ Օրենքով նրան պետք է տեղափոխեին քաղաքացիական հիվանդանոց, բայց Արամը ցանկություն չէր հայտնել։ Արամ Հակոբյանը հրաժարվել է նաև շտապօգնության ծառայությունից։
Առավել մանրամասն՝ տեսանյութում:
