ԴԱԻՇ ահաբեկչական խմբավորման գրոհայինները հավանաբար ստեղծել են ռումբի նոր տեսակ։ Այդ մասին հայտնում է BBC-ն՝ հղում անելով աղբյուրներին, որոնք մոտ են Բաղդադում հուլիսին տեղի ունեցած ահաբեկչության հետաքննությանը։
Այս ամսվա սկզբին ԴԱԻՇ-ի գրոհայիններն իրականացրել են իրենց պատմության մեջ խոշորագույն ահաբեկչություններից մեկը. հուլիսի 3-ին Բաղդադի Էլ-Կարադա շրջանում տեղի ունեցած պայթյունի հետևանքով զոհվել է 292 մարդ։
Ինչպես հայտնում է Բաղդադում անվտանգության արևմտյան ծառայության աղբյուրը, Էլ-Կարադայում «արտասովոր ռումբ» է պայթել։
«Մենք երբեք նման բան չէինք տեսել, և դա լուրջ մտահոգություններ է առաջացնում»,- հայտարարել է աղբյուրը։
Ըստ ամենայնի՝ նրանք, ովքեր պատրաստել են ռումբը, օգտվել են համացանցում հասանելի բանաձևից, սակայն որոշակի փոփոխություններ են կատարվել, որպեսզի մի կողմից նվազեցվի դրա հայտնաբերման ռիսկը հսկիչ-անցակետի կողմից, մյուս կողմից՝ մեծացնի խոցման տարածքը։
Որոշ իրաքցի փորձագետներ ռումբի քիմիական կազմը անվանել են «եզակի»։