Թուրքական Anadolu լրատվական գործակալության փոխանցմամբ՝ Թուրքիայի վարչապետ Բինալի Յըլդըրըմը Անկարայում հայտարարել է, որ փակվելու է «Աքընջը» ավիաբազան, որն օգտագործվել է ռազմական հեղաշրջման փորձի ժամանակ:
«Մենք պատասխանատվության կենթարկենք և կստիպենք զղջալ նրանց, ովքեր անխղճորեն ինքնաթիռներից ու ուղղաթիռներից ռումբեր են նետել խաղաղ բնակիչների վրա, նրանց վրա կրակել են տանկերից, որոնք գնվել են այդ նույն ազգի գումարով»,- տեղեկացրել է նա:
Դիմելով քաղաքացիներին՝ Թուրքիայի վարչապետը հայտարարել է. «Միավորելով սրտերն ու կամքը՝ դուք դիմակայեցիք խռովարարներին: Ցանկանում եմ հայտարարել, որ «Աքընջըի» ավիաբազան, ուր իրենց բջիջներն են ձևավորել դավաճանները, փակվելու է: Այդ տարածքը դառնալու է վայր, ուր կհարգենք զոհվածների հիշատակը:
Որևէ մեկն ունակ չէ բաժանել ու մասնատել այս պետությունն ու երկիրը: Մենք Թուրքիա կհասցնենք հեղաշրջման մեղավորին՝ ահաբեկիչների գլխավորին (Ֆեթհուլլահ Գյուլեն), որը ներկայումս գտնվում է ԱՄՆ-ում»: