Պավել և Արամ Մանումկյաններին ԱԱԾ քննիչները մեղադրանք են առաջադրել հենց հիվանդասենյակում, երբ նրանք միացված են եղել արհեստական շնչառական սարքերին։ Նրանք, սակայն, հրաժարվել են ծանոթանալ որևէ փաստաթղթի և ստորագրել դրանք: Այս մասին այսօր կազմակերպված քննարկման ժամանակ ասաց Մանուկյանների պաշտպան Ինեսա Պետրոսյանը։
Փաստաբանը նշեց, որ իր պաշտպանյալ Արամ Մանուկյանին ծայրահեղ ծանր վիճակում են տեղափոխել «Դատապարտյալների հիվանդանոց»։ «Առաջին անգամ, երբ ես այցելեցի այդ հաստատություն, և ինձ ուղեկցեցին այն սենյակը, որտեղ Արամ Մանուկյանն էր, դա ինձ հիվանդանոց չհիշեցրեց։ Դա մի խայտառակ սենյակ էր՝ բորբոսնած պատերով, կողտոտ սենյակ։ Այդ սենյակում միայնակ պառկած էր Արամը, կողքին՝ մի սեղանի վրա, դրված էր մի հաց ու պանիր, որը նա այդ վիճակում չէր կարող ուտել»,- ասաց Պետրոսյանը։
Պաշտպանը Արամ Մանուկյանի վիճակի հետ կապված դիմում է ներկայացրել նախաքննական մարմնին, քանի որ մարդու իրավունքների կոպտագույն խախտում է տեսնում՝ կոնվենցիայի երրորդ հոդվածի խախտում։
Այսօր առավոտյան փաստաբանը կրկին տեսակցել է Արամ Մանուկյանին և պարզել, որ ամբողջ գիշեր խավարասերները ման են եկել Արամի բաց վերքի վրայով, և նա այդ վիճակով փորձել է այս ու այն կողմ նետել դրանց։
«Սա միանշանակ խոշտանգում է և կոնվենցիայի երրորդ հոդվածի խախտում»,- նկատեց փաստաբանը։
Առավել մանրամասն՝ տեսանյութում: