«Ազգային անվտանգություն» կուսակցության նախագահ Գառնիկ Իսագուլյանը երկրում ստեղծված իրավիճակի կապակցությամբ հանդես է եկել հայտարարությամբ, որում նա ահաբեկիչներ է անվանել «Սասնա ծռերի» տղաներին այն պահից սկսած, երբ նրանք, իր իսկ խոսքով, պատանդ վերցրեցին բուժաշխատողներին: Ընդ որում, Գառնիկ Իսագուլյանը պատանդ է համարում ոչ միայն նրանց, այլև տղաներին դրսից աջակցող մարդկանց:
Գառնիկ Իսագուլյանը փորձեց ներկայացնել նաև Ալեք Ենիգոմշյանի «անցած ուղին». «1980 թվականին Ժնևում պարոն Ենիգոմշյանը Սյուզի Մահսերեջյանի հետ միասին նախապատրաստել են ահաբեկչական ակտ: Ռումբը հյուրանոցի համարում պայթել է իր ձեռքում (որովհետև թերևս սխալ էր միացրել, իսկ Սյուզին գտնվել է հարևան սենյակում), և ինքը կորցրել է ձեռքն ու տեսողությունը: Սակայն Սյուզի Մահսերեջյանը, որը Մոնթե Մելքոնյանի եղբոր՝ Մարգար Մելքոնյանի կինն է և այժմ ապրում է ԱՄՆ-ում, հավասարապես կրել է պատիժը Ենիգոմշյանի հետ միասին»:
Գառնիկ Իսագուլյանը Ալեք Ենիգոյանին կոչ է անում պատասխանել՝ ո՞ւմ դեմ էր ուղղված այդ ահաբեկչական գործողությունը. «Շատերի մոտ առկա է այն թյուր կարծիքը, որ դա ուղղված էր թուրքական դեսպանատան դեմ: Դա չի համապատասխանում իրականությանը»:
«Ազգային անվտանգություն» կուսակցության նախագահը հնչեցրեց բարերար Վահե Գաբրաշի անունը, որը այժմ ՀՀ քաղաքացի է և մեծապես օգնում է ԼՂՀ-ին: «Ի՞նչ է հայտնաբերվել Ալեք Ենիգոմշյանի գրպանում՝ արդյո՞ք թուրքական դեսպանատան նախագիծը, թե՞ ուրիշ մեկի տան նախագիծը, որից իրենք պահանջել են փող, իսկ նա հրաժարվել է տալ»,- հարցադրում է անում Իսագուլյանը:
Այս փաստաթղթերը առկա են շվեյցարական հատուկ ծառայությունների մոտ՝ հայտնեց Գառնիկ Իսագուլյանը՝ հեռակա դիմելով պարոն Ենիգոմշյանին. «Ես կարեկցում եմ ձեզ, դուք հայրենասեր մարդ եք, բայց պետք չէ ստել, առավել ևս՝ ստախոս հանել լեգենդար հերոսին»:
Վիտալի Բալասանյանը իր կյանքով, իր արյան գնով ապացուցել է, որ ինքը երբեք չի ստում և որևէ մեկին թյուրիմացության մեջ չի գցում՝ ասաց Գառնիկ Իսագուլյանը. «Եթե նա շարունակեր իր միջնորդական առաքելությունը, ես կարծում եմ՝ հաջորդ օրը հանգուցալուծումը արդեն իսկ պատրաստ կլիներ»:
