Համացանցով մանրածախ առևտրի հարթակ Amazon-ի զուտ շահույթը 2016 թվականի երկրորդ եռամսյակի արդյունքներով հասել է 857 մլն դոլարի։ Այս մասին ասվում է ընկերության մամլո հաղորդագրությունում։
Անցած տարվա ապրիլ-հունիս ամիսներին ընկերության շահույթը կազմել է 92 մլն դոլար, այսպիսով մեկ տարում շահույթն աճել է ավելի քան 9 անգամ։
Ընթացիկ տարվա առաջին եռամսյակում Amazon-ի շահույթը ռեկորդ է սահմանել ընկերության պատմության մեջ։ Հունվար-մարտ ամիսներին այն կազմել է 513 մլն դոլար՝ ընդդեմ 2015-ի առաջին եռամսյակի 57 մլն դոլար կորստի։
Ֆինանսական արդյունքների հայտարարումից հետո ընկերության հիմնադիր-ղեկավար Ջեֆ Բեզոսի կարողությունն ավելացել է 2.6 մլրդ դոլարով և հասել 66.5 մլրդ դոլարի՝ հայտնում է Forbes-ը։ Amazon-ի բաժնետոմսերի արժեքը բարձրացել է 2.2 տոկոսով՝ հասնելով 753 դոլարի՝ հերթական անգամ թարմացնելով պատմական ռեկորդը։