Մինչ Հայաստանում ծավալվում են հայտնի իրադարձությունները, իրադարձությունները բավական հետաքրքրական երանգներով են սկսել ծավալվել ռուս-թուրքական հարաբերությունների դաշտում: Թուրքական «Միլիեթը» գրում է, որ օգոստոսի 31-ին Անթալիայում տեղի կունենա Ռուսաստանի և Թուրքիայի ֆուտբոլի հավաքականների հանդիպում. քաղաքական նպատակներով, հարաբերությունները կարգավորելուն օժանդակելու համար:
Ըստ թուրքական թերթի՝ օգոստոսի 9-ին Ռուսաստանում կհանդիպեն Էրդողանն ու Պուտինը, և Թուրքիայի նախագահը այդ օրը ՌԴ նախագահին կհրավիրի Անթալիայում կայանալիք խաղը դիտելու:
Սա ձեզ ինչ որ բան չի՞ հիշեցնում: Դե, իհարկե, ֆուտբոլային դիվանագիտությունը, որը 8 տարի առաջ հայ-թուրքական էր, սակայն սկսել էր Ռուսաստանից, որտեղ այցելել էր Սերժ Սարգսյանը նախագահի պաշտոնում հայտնվելուց հետո:
Հենց Մոսկվայում էլ Սարգսյանը հայտարարեց Գյուլին ֆուտբոլի հրավիրելու մասին: Այս անգամ ֆուտբոլային դիվանագիտությամբ կզբաղվեն արդեն Ռուսաստանն ու Թուրքիան: Կասկած չկա, որ այս դիվանագիտությունը կներառի նաև Հայաստանի շահերը, ինչի մասին վկայում է Թուրքիայի արտգործնախարարի՝ օրերս արած հայտարարությունը հայ-թուրքական սահմանը բացելու և հայ-թուրքական հարաբերությունները կարգավորելու պատրաստակամության մասին, որը քննարկում են Ադրբեջանի հետ: Այլ կերպ ասած՝ մենք տեսնում ենք գրեթե նույն՝ ութամյա վաղեմությամբ բովանդակության ֆուտբոլային դիվանագիտության մեկնարկ, որտեղ, սակայն, Հայաստանին փոխարինել է Ռուսաստանը և, ամենայն հավանականությամբ, պարզապես «խաղացող մարզչի» կարգավիճակով:
Մոսկվան երևի որոշել է Թուրքիայի հետ հարաբերությունների գործը չվստահել Հայաստանին, որովհետև սեղանին դրված է բավականին բարձր խաղադրույք, և Ռուսաստանը չի ցանկանում ֆուտբոլային դիվանագիտության նոր փորձը արժանացնել նախկինի ճակատագրին: Իսկ այն, որ այս դիվանագիտությունն էլ չէր անցնելու առանց հայ-թուրքական սահմանի, անկասկած էր, քանի որ հայ-թուրքական սահմանը այն «փշրանքն» է, որ նետվելու է Հայաստանին՝ Ղարաբաղի հարցում զիջումների դիմաց: Սահման, որը, սակայն, ընդամենը դե յուրե կլինի հայ-թուրքական, իսկ իրականում կհանդիսանա ռուս-թուրքական սահման, ինչպես, ըստ էության, սահմանված է ռուս-թուրքական պայմանագրով՝ կնքված 1921 թվականին Մոսկվայում:
