«Բռնությունը միակ բանն է, որով առաջնորդվում է այսօրվա իշխանությունը»,- «Առաջին լրատվական»-ի հետ զրույցում ասաց իրավապաշտպան Ժաննա Ալեքսանյանը՝ անդրադառնալով զինված խմբի երկու անդամների վերաբերյալ փաստաբանի հայտարարությանը, թե իրավապահներին հանձնվելուց հետո նրանց մոտ մարմնական վնասվածքներ են հայտնաբերվել։ Իրավապաշտպանը նաև նկատեց, որ ինքը չի հավատում, որ զինված խմբի երկու անդամները հանձնվել են իրավապահներին, ինչպես նշվում է պաշտոնական հաղորդագրության մեջ։
Ժաննա Ալեքսանյանի համար առավել արժանահավատ է տղաների վարկածը, որ նրանք տարել են հանձնելու իրենց ընկերներին, բայց հայտնվել են ծուղակի մեջ։ «Այսինքն՝ եղել է պայմանավորվածություն, սակայն դրանից հետո կրակել են տղաների վրա։ Սա է այս պետության դեմքը։
Այս փոքրիկ դրվագը ամենավառ ապացույցն է, թե ինչպես է իշխանությունն ատում այս տղաներին և առհասարակ իր երկրի քաղաքացիներին։ Փողոցից, նստարաններից կտրում են տարեց մարդկանց, կանանց և բերման են ենթարկում։ Մեր երկրի ոստիկանությունը դեգրադացվել է, և այդ պրոցեսն անդառնալի է»,- նկատեց իրավապաշտպանը։ Վերջինս ուշադրություն հրավիրեց այն փաստի վրա, թե ինչպես պատահեց, որ տղաները գրավեցին գնդի տարածքը։ Արդյոք դա այդքան հե՞շտ էր, և ինչո՞վ էր այդ ժամանակ զբաղված Ազգային անվտանգության ծառայությունը։
«Նրանք պետք է անգործության համար պատասխանատվության ենթարկվեն։ Սա արտառոց չեպե է։ Որևէ այլ երկրում դժվար թե նման բան լիներ։ Այսինքն՝ այսքանից կարող ենք հետևել, որ գնդի տարածքը հանգիստ կարող էին գրավել նաև մի քանի ասենք Իրանի քաղաքացիներ»,- նկատեց իրավապաշտպանը։
Ժաննա Ալեքսանյանի խոսքով՝ որքան էլ իշխանությունը, ոստիկանությունը գնա բռնությունների, միևնույն է, նրանց չի հաջողվի բռնությամբ ճնշել տղաներին անկախ իրավիճակի հանգուցալուծումից, քանի որ շարժումը շատ է մեծացել, և օր օրի ավելի հոծ բազմություն է դուրս գալիս փողոց։
Իրավապաշտպանը կարծում է, որ դեռ ուշ չէ իրավիճակը խաղաղ ճանապարհով լուծել։ Դրա համար մեկ ելք կա՝ Սերժ Սարգսյանի հրաժարականը։
Առավել մանրամասն՝ տեսանյութում: