Թուրքական Milliyet թերթի փոխանցմամբ՝ ԱՄՆ պետդեպարտամենտի խոսնակ Ջոն Կիրբին լրագրողների հետ զրույցում անդրադարձել է թուրք-ամերիկյան հարաբերությունների ներկայիս վիճակին:
Կիրբին հայտարարել է, որ ԱՄՆ-ը կապված չէ հուլիսի 15-ին Թուրքիայում իրականացված ռազմական հեղաշրջման փորձի հետ:
«Թուրքիան ոչ միայն դաշնակից է, այլև՝ բարեկամ: Թուրքիան կարևոր դերակատարություն ունի ԴԱԻՇ-ի դեմ պայքարում, այդ հարցի շուրջ շարունակվում է Անկարայի ու Վաշինգտոնի միջև համագործակցությունը»,- ասել է նա:
Խոսելով ԱՄՆ-ում բնակվող իսլամական-հասարակական գործիչ Ֆեթհուլլահ Գյուլենի արտահանձնման խնդրի մասին՝ Կիրբին հայտարարել է, որ այդ հարցում չկա նոր զարգացում:
Կիրբին հայտարարել է, որ ԱՄՆ-ը Թուրքիայից ստացել է Գյուլենի գործունեության վերաբերյալ մի շարք փաստաթղթեր, որոնք այժմ վերլուծության են ենթարկվում: Կիրբին կարևորել է Թուրքիայում ժողովրդավարության նորմերի պահպանումը: