ԱՄՆ նախագահի հանրապետական թեկնածու Դոնալդ Թրամփը սուր քննադատության է ենթարկել իր դեմոկրատ հակառակորդ Հիլարի Քլինթոնին անմիջապես այն բանից հետո, երբ Քլինթոնն ավարտել է Ֆիլադելֆիայում Դեմոկրատական կուսակցության համագումարում իր ելույթը: Այս մասին հայտնում է RIA Novosti-ն:
«Ոչ ոք որոշումներ ավելի վատ չի ընդունում, քան Հիլարի Քլինթոնը՝ կոռուպցիան և կործանումը հետևում են նրան ամենուր»,- գրել է Թրամփը իր թվիթերյան էջում:
«Հիլարիի պատերազմները Մերձավոր Արևելքում հանգեցրել են ավերածության, ահաբեկչության և ամբողջ աշխարհում ԴԱԻՇ-ի (գործունեության)»,- մեկ այլ թվիթում գրել է Թրամփը: Նա նաև Քլինթոնին մեղադրել է, որ նա «արմատական իսլամ» խոսքերը չի ասել ահաբեկչության մասին խոսելիս:
Թրամփը քննադատել է նաև Քլինթոնի տնտեսական ծրագիրը: «Հիլարին աշխարհը պատկերացնում է առանց սահմանների, որտեղ աշխատող մարդիկ չունեն ո՛չ իշխանություն, ո՛չ աշխատանք, ո՛չ անվտանգություն»,- հայտարարել է Թրամփը: «Հիլարին երբեք չի բարեփոխի Ուոլ Սթրիթը: Նա պատկանում է Ուոլ Սթրիթին»,- հավելել է նա: