Քաղաքացիական հասարակությունները դատապարտում են Ազգային ժողովի աններելի և անթույլատրելի անգործությունը և հանդես են եկել նախաձեռնությամբ՝ պատգամավորներին կոչ անելով օգտվել արտահերթ նիստ հրավիրելու իրենց սահմանադրական իրավունքից՝ ստեղծված իրավիճակը քննարկելու և խաղաղ լուծումներ գտնելու նպատակով:
«Թրանսփարենսի ինթերնեյշնլ» հակակոռուպցիոն կենտրոնի գործադիր տնօրեն Վարուժան Հոկտանյանը «Առաջին լրատվական»-ին տեղեկացրեց, որ այս պահի դրությամբ նախաձեռնությանը միացել է մոտ 8-10 կազմակերպություն. «Այսպիսի դեպքերում՝ առավել ևս, երբ մենք դառնում ենք խորհրդարանական հանրապետություն, Ազգային ժողովի դերը պետք է դառնա առանցքային: Մինչդեռ ԱԺ ղեկավարությունը կարծես կաթվածահար վիճակում է՝ ոչ մի կերպ չի արձագանքում ստեղծված իրավիճակին»:
Նրա խոսքով՝ այս լռությունը դե ֆակտո կարելի է հասկանալ՝ հաշվի առնելով, որ մենք չունենք իշխանության 3 անկախ ճյուղերի դասական համակարգ: «Անկախ նրանից, թե ինչպիսին են եղել ընտրությունները, սակայն նրանք համարվում են ժողովրդի կողմից ընտրված պատգամավորներ, ուրեմն պարտավոր են ժողովրդին ներկայացնել իրենց ասելիքը»,- նկատեց Վարուժան Հոկտանյանը:
Մեր զրուցակցի կարծիքով՝ «Սասնա ծռերի» ցանկությունը՝ հասնել համազգային ապստամբության, տեղի չունեցավ, և այդ շարժումը շատ արագ լոկալիզացվեց ՊՊԾ գնդի տարածքով. «Նրանց համոզմամբ՝ խաղաղ սահմանադրական ուղիները սպառվել են և պետք է փոփոխությունների հասնել զինված ճանապարհով: Այլ հարց է, թե որքանով է մեր երկրում զինված ճանապարհը ընկալելի և ընդունելի, որքանով է մեր հասարակական գիտակցությունը պատրաստ այդ քայլերին»:
Վարուժան Հոկտանյանը «Սասնա ծռերին» միանշանակորեն չի համարում ահաբեկիչ, այլ համարում է ապստամբ. «Սակայն, դժբախտաբար, նրանք ապստամբում են մի երկրում, որի հասարակությունը որպես բողոքի ձև նախընտրել է արտագաղթը»:
