«Ոստիկանության գործողությունները՝ սկսած հուլիսի 17-ից, զանգվածային ապօրինություններ են, որովհետև մարդուն տանել ոստիկանության բաժին՝ առանց որևէ հիմնավորման, ապօրինություն է ի սկզբանե՝ անկախ նրանից, թե նրան քանի ժամ են պահել»,- «Առաջին լրատվական»-ի հետ զրույցում ասաց ՀՔԱ Վանաձորի գրասենյակի նախագահ Արթուր Սաքունցը:
Ժուռնալիստների «Ասպարեզ» ակումբի նախագահ Լևոն Բարսեղյանին բերման ենթարկելը այդ առևանգումների շրջանակում է՝ համոզված է իրավապաշտպանը. «Ես սա համարում եմ Լևոն Բարսեղյանի նկատմամբ քաղաքական հետապնդում»:
Հարցին՝ ո՞րն է իշխանության նպատակը, մեր զրուցակիցը պատասխանեց. «Բողոքի ցույցերը կասեցնելու նրանց ենթադրյալ նպատակը արդեն իրավաչափ չէ: Այնպես որ՝ մենք գործ ունենք ապօրինությունների մի ամբողջ շղթայի հետ»:
Նրա խոսքով՝ ոստիկանության խայտառակ գործողությունները կոչվում են «Սասնա ծռերի» անդամների հարազատների պատանդառություն. «Ամբողջ գործողությունների նպատակը հիմնված է քաղաքական նպատակահարմարության վրա: Իշխանությունները համարժեք չեն գնահատում իրավիճակը և հնարավոր հետևանքները՝ հույսը դնելով միայն ուժային մեթոդների կիրառման վրա, ընդ որում՝ այդ մեթոդներով փորձելով ճնշել նաև հանրության կողմից «Սասնա ծռերի» բարձրացրած հարցերի լեգիտիմացումը»:
Այսօրվա գործողությունները հաստատում են, որ լիդերների ժամանակն անցել է, և այժմ հասարակությունն ինքնակազմակերպվում է, իսկ հասարակության այդ փոփոխությունը չեն տեսնում իշխանությունները՝ նշեց իրավապաշտպանը: