ԱՄՆ նախագահի դեմոկրատ թեկնածու Հիլարի Քլինթոնը հայտարարել է «ռուսական սպառնալիքի» դեմ պայքարում ՆԱՏՕ-ին աջակցության մասին: Այս մասին հայտնում է RIA Novosti-ն:
«Ես հպարտ եմ նրանով, որ աջակցում եմ ՆԱՏՕ-ում մեր դաշնակիցներին ցանկացած սպառնալիքի, որին նրանք բախվում են, ներառյալ՝ Ռուսաստանի կողմից սպառնալիքի դեմ»,- ասել է Քլինթոնը Ֆիլադելֆիայում Դեմոկրատական կուսակցության համագումարում ելույթի ժամանակ:
Քլինթոնը նաև խոստացել է «պարտության մատնել» ԱՄՆ թշնամիներին: Առանձին նա կանգ է առել ԴԱԻՇ-ի դեմ պայքարի վրա:
«Մենք կհարվածենք նրանց ապաստարանների ուղղությամբ օդից և կաջակցենք տեղական ուժերին նրանց ցամաքում ոչնչացնելու գործում»,- ասել է Քլինթոնը:
Նա նշել է, որ իր գլխավոր առաջնայնությունը կլինի ամերիկացիների անվտանգությունը:
Քլինթոնը նաև ԱՄՆ նախագահի հանրապետական թեկնածու Դոնալդ Թրամփին մեղադրել է «չարակամ» հռետորության և վիրավորանքների համար:
«Մենք կդիմակայենք չարակամ, մարդկանց բաժանող հռետորությանը՝ այն որտեղից էլ գա: Վերջին տարում շատ մարդիկ սխալ են արել՝ ուշադրություն չեն դարձրել Դոնալդ Թրամփի հայտարարություններին, նրան ներել են որպես շոու կազմակերպող շոումենի»,- ասել է Քլինթոնը:
«Նրանք մտածել են, որ չէր կարող նկատի ունենալ բոլոր այն սարսափելի բաները, որ ասել է, օրինակ՝ երբ կանաց անվանել է խոզեր կամ պնդել է, որ ամերիկացի դատավորը չի կարող արդար լինել, քանի որ ծնունդով Մեքսիկայից է»,- հավելել է Քլինթոնը: Նա հիշեցրել է, որ Թրամփը մնջախաղի միջոցով նմանակել է հաշմանդամ լրագրողին և վիրավորել է Վիետնամի պատերազմի ժամանակների ռազմագերի, ներկայումս սենատոր Ջոն Մաքքեյնին:
«Ես նույնպես չէի կարողանում հավատալ այդ ամենին: Դժվար էր հավատալ, որ մարդ, որն ուզում է ղեկավարել մեր երկիրը, կարող է նման բան ասել: Բայց տխուր իրականությունն այն է, որ ուրիշ Դոնալդ Թրամփ չկա: Նա հենց այդպիսին է»,- հայտարարել է Քլինթոնը:
