ԱՄՆ նախագահի թեկնածու Հիլարի Քլինթոնը կարծում է, որ երկրի համար վրա է հասել ճշմարտության պահը, երբ պետք է դիմակայել սպառնալիքներին, որոնք ծառացած են երկրի առջև։ «Ամերիկայի համար կրկին եկել է ճշմարտության պահը։ Զորեղ ուժերը սպառնում են մեզ մասնատել։ Վստահությունն ու հարգանքը նվազում են»,-հայտարարել է Քլինթոնը՝ ելույթ ունենալով Դեմոկրատական կուսակցության համագումարում։ Այս մասին հայտնում է RIA Novosti-ն։
«Մենք ոտքի կկանգնենք սպառնալիքների դեմ, ինչպես արել ենք մշտապես»,- հավելել է նա։ Քլինթոնը պարզաբանել է, որ սպառնալիքները կրում են ամենատարբեր բնույթներ և ընդգրկում ինչպես արտաքին, այնպես էլ ներքին ոլորտները։
Քլինթոնը մրցակցի՝ սենատոր Բերնի Սանդերսի կողմնակիցներին համագործակցության կոչ է արել։ Նա երախտագիտություն է հայտնել Սանդերսին այն բանի համար, որ նա ոգեշնչել է միլիոնավոր ամերիկացիների, հատկապես երիտասարդներին, և առաջին պլան քաշել տնտեսության և սոցիալական արդարության հարցերը։
Քլինթոնը խոստացել է դաշնակիցների հետ հաղթել ահաբեկչությանը։
ԱՄՆ նախագահի դեմոկրատ թեկնածուն հայտարարել է, որ իր հանրապետական մրցակից Դոնալդ Թրամփը վախի մթնոոլորտ է սերմանում և խոստացել է չիրականացնել Մեքսիկայի հետ սահմանին պատի կառուցման նրա գաղափարն ու չարգելել մուսուլմանների միգրացիան։