«Ջաբհաթ ան-Նուսրա» ծայրահեղական խմբավորումը իր ղեկավար մարմնի որոշմամբ փոխել է անվանումը` դարձնելով «Ջաբհաթ Ֆաթհ աշ-Շամ» և առանձնացել է «Ալ-Քաիդա»-յից: Ինչպես հայտնել է Daily Star-ը, այդ որոշման մասին հայտարարել է խմբավորման առաջնորդ Աբու Մուհամեդ ալ-Ջուլանին:
«Մենք հայտարարում ենք «Ջաբհաթ ան-Նուսրա» անվան տակ գործողությունների լիարժեք հրաժարման մասին և ստեղծում ենք նոր «Ջաբհաթ Ֆաթահ աշ-Շամ» խմբավորում: Նոր կազմակերպությունը կապեր չունի ոչ մի արտաքին խմբավորման հետ»,- Ջուլանիի խոսքերը մեջբերում է Al Jazeera հեռուստաալիքը:
Ավելի վաղ «Ալ-Քաիդա» ահաբեկչական ցանցի առաջնորդ Այման ազ-Զավահիրին օրհնել էր իր ենթակաների որոշումը: «Ջաբհաթ ան-Նուսրան» մինչև վերջերս համարվում էր «Ալ-Քաիդա»-յի սիրիական մասնաճյուղը: Նրա շարքերում կռվում են հարյուրավոր արտասահմանցի վարձկաններ:
